ٹیکنالوجی کمپنیوں نے ٹریزا مے کے الزامات مسترد کر دیے

ٹوئٹر فیس بک

،تصویر کا ذریعہAFP/Getty Images

،تصویر کا کیپشن

ٹریزا مے نے اتوار کو کہا تھا کہ ٹکنالوجی کمپنیوں کے لیے مزید ضابطے بنائے جانے چاہییں

بین الاقوامی ٹیکنالوجی کمپنیوں نے برطانوی وزیر اعظم ٹریزا مے کے الزامات کی تردید کی ہے کہ وہ اسلام پسند انتہا پسندی کو 'محفوظ جگہ' فراہم کرتے ہیں۔

خیال رہے کہ ٹریزا مے نے لندن میں ہونے والے حملے کے ضمن میں کہا تھا کہ دہشت گردوں کے حملے کی منصوبہ بندی کو روکنے کے لیے سائبر سپیس کو منضبط کرنے کی بین الاقوامی معاہدے کی ضرورت ہے۔

انھوں نے کہا کہ انٹرنیٹ کے بعض حصوں کو بند کر دینا چاہیے کیونکہ ٹیکنالوجی کی بڑی کمپنیاں دہشت گردانہ نظریات کو 'محفوظ مقام' فراہم کرتے ہیں۔

لیکن اوپن رائٹس گروپ نے کہا کہ سماجی رابطے کی کمپنیاں مسئلہ نہیں ہیں جبکہ ریڈيکلائزیشن کے ایک ماہر نے ٹریزا مے کے بیان کو 'دانشوارنہ طور پر کاہل' سے تعبیر کرتے ہوئےتنقید کا نشانہ بنایا۔

ٹوئٹر، فیس بک اور گوگل کا کہنا ہے کہ وہ انتہا پسندی سے لڑنے کے لیے پہلے سے ہی سخت کوشش کر رہے ہیں۔

ٹریزا مے کے الزامات کے جواب میں گوگل نے کہا ہے کہ اس نے پہلے ہی لاکھوں ڈالر اس مسئلے سے نمٹنے کے لیے خرچ کر رکھے ہیں جبکہ فیس بک نے کہا کہ وہ جارحانہ انداز میں اس قسم کے مواد کو ہٹاتا رہتا ہے۔

،تصویر کا ذریعہEPA

،تصویر کا کیپشن

برطانوی وزیر اعظم نے اتوار کو ہونے والے حملے کے پیش نظر ٹکنالوجی کمپنیوں کو تنقید کا نشانہ بنایا تھا

بی بی سی کے ایک نمائندے کا کہنا ہے کہ ٹیکنالوجی کا شعبہ اس بات پر تقریبا متفق ہے کہ میسجنگ کے ایپ میں انکرپشن کو کمزور کرنے سے تمام صارفین کی پرائیویسی کو شدید خطرہ لاحق ہو جائے گا۔

گوگل (یوٹیوب اس کا حصہ ہے) فیس بک (واٹس ایپ اس کا حصہ ہے) اور ٹوئٹر پر پہلے سے ہی انتہا پسند مواد سے نمٹنے کا دباؤ ہے جو کہ اتوار کے بعد مزید بڑھ گیا۔

برطانوی وزیرِ اعظم ٹریزا مے نے کہا: 'ہم اس نظریے کو پنپے کے لیے محفوظ مقامات فراہم نہیں کر سکتے۔ تاہم انٹرنیٹ اور بڑی کمپنیاں ۔۔۔ فراہم کر رہی ہیں۔'

وزیر داخلہ امبر روڈ نے کہا کہ سوشل میڈیا کمپنیوں کے لیے بین الاقوامی معاہدے کی ضرورت ہے تاکہ وہ ریڈیکلائزیشن کو روکنے کے لیے مزید کوشش کریں۔

پرائیوسی اور آن لائن پر اظہار رائے کی آزادی کی حمایت کرنے والے اوپن رائٹس گروپ نے متنبہ کیا کہ مزید ضابطوں سے دہشت گردوں کے 'ذلیل نٹورک' کے ویب کے 'مزید اندھیرے حصوں' میں جانے کا خطرہ پیدا ہو جائے گا۔

انھوں نے کہا کہ 'فیس بک جیسی انٹرنیٹ کمپنیاں نفرت اور تشدد کے اسباب نہیں ہیں بلکہ غلط طریقے سے انھیں مہرہ بنایا جا سکتا ہے۔'