نوکری پر آخری دن، امریکی صدر ٹرمپ کا ٹوئٹر اکاؤنٹ بند کر دیا

ٹرمپ

،تصویر کا ذریعہTwitter

،تصویر کا کیپشن

صدر ٹرمپ کا ٹوئٹر اکاؤنٹ 11 منٹ کے لیے بند ہو گیا تھا

امریکی صدر ڈونلڈ ٹرمپ نے جمعرات کو کچھ دیر کے لیے اپنا ٹوئٹر اکاؤنٹ بند ہونے پر کہا ہے کہ ’ٹوئٹر میں کام کرنے والے ایک شخص نے اپنے طور پر گیارہ منٹ کے لیے میرا اکاؤنٹ غائب کر دیا۔ لگتا ہے کہ دنیا کو اب پتہ چل رہا ہے، اور اثر بھی ہو رہا ہے۔‘

،تصویر کا ذریعہTWITTER

کمپنی کے مطابق اکاؤنٹ کو کچھ ہی دیر بعد بحال کر دیا گیا تھا۔

ٹوئٹر کمپنی نے اپنی بیان میں کہا کہ کمپنی سے فارغ ہونے والے ایک اہلکار نے اپنی نوکری کے آخری دن صدر ٹرمپ کا اکاؤنٹ @ریئل ڈونلڈ ٹرمپ بند کر دیا تھا۔

صدر ٹرمپ کا اکاؤنٹ 11 منٹ کے لیے بند رہا اور کمپنی اس بارے میں مزید تفتیش کر رہی ہے۔

صدر ٹرمپ ٹوئٹر کا باقاعدگی سے استعمال کرتے ہیں اور ان کے چار کروڑ سے زیادہ فالوئرز ہیں۔

جمعرات کی شام صدر ٹرمپ کے اکاؤنٹ کے صفحے پر جانے والے صارفین کے سامنے پیغام آ رہا تھا کہ 'معذرت، یہ پیج موجود نہیں ہے۔'

،تصویر کا ذریعہTwitter

،تصویر کا کیپشن

صدر ٹرمپ کے ٹوئٹر پر چار کروڑ سے زائد فالوئرز ہیں

اکاؤنٹ بحال ہونے کے بعد صدر ٹرمپ کی پہلی ٹویٹ ریپبلیکن پارٹی کے نئے ٹیکس پلان کے بارے میں تھی۔

واضح رہے کہ امریکی صدر کا سرکاری اکاؤنٹ متاثر نہیں ہوا تھا۔

ٹوئٹر نے اپنے بیان میں کہا کہ وہ اس واقعے کے مزید تفتیش کر رہے ہیں تاکہ ممکن بنایا جا سکے کہ ایسا دوبارہ نہ ہو۔

بعد میں انھوں نے اپنی ٹویٹ میں کہا: 'ہماری تفتیش سے یہ معلوم ہوا ہے کہ اکاؤنٹ ٹوئٹر کسٹمر سپورٹ کے ایک نمائندے نے بند کیا تھا جس کا کمپنی میں آخری دن تھا۔ ہم اس بارے میں مزید کام کر رہے ہیں۔'

صدر ٹرمپ نے ٹوئٹر کا استعمال مارچ 2009 میں شروع کیا تھا اور وہ سوشل میڈیا اپنی پالیسیوں کے اعلان کرنے کے لیے اور اپنے ناقدین پر تنقید کرنے کے لیے استعمال کرتے رہے ہیں۔

اس کے بعد ٹوئٹر پر ایک نہایت ہی دلچسپ بحث چھڑ گئی۔ بہت سے ٹوئٹر صارفین نے ایسا کرنے والے اہلکار کو ہیرو قرار دیا تو وہیں کئی نے اس پر ناراضی کا بھی اظہار کیا۔

،تصویر کا ذریعہTWITTER

ٹیڈ لیو جو کہ امریکی کانگریس کے رکن ہیں، انہوں نے لکھا، ’اس ٹوئٹر اہلکار کے نام جس نے ٹرمپ کا اکاؤنٹ بند کیا: آپ نے گیارہ منٹ کے لیے امریکہ کو خوش کر دیا۔ میں آپ کے لیے پیتزا ہٹ کا پیتزا خریدوں گا۔‘

،تصویر کا ذریعہTWITTER

ہارلن ہل نے اپنے ٹویٹ میں لکھا، ’ اگر کوئی بھی ٹوئٹر اہلکار صدر کا اکاؤنٹ بند کر سکتا ہے، تو ہم سب کے لیے کیا امید ہے؟‘