کافی سے کینسر ہو سکتا ہے، اب یہ بتانا پڑے گا: امریکی عدالت

تصویر کے کاپی رائٹ AFP
Image caption سٹار بکس سمیت تقریباً 90 کافی کمپنیوں پر صارفین کو کافی میں موجود زہریلے کیمیکل کے بارے میں آگاہ نہ کرنے پر مقدمہ کیا گیا ہے

امریکی شہر لاس اینجلس کی ایک عدالت نے حکم دیا ہے کہ ریاست کیلیفورنیا میں فروخت کی جانے والی کافی پر سرطان سے خبردار کرنے کا پیغام (وارننگ لیبل) لگانا ضروری ہے۔

کونسل فار ایڈجوکیشن اینڈ ریسرچ آن ٹاکسکس نے سٹار بکس سمیت تقریباً 90 کافی کمپنیوں پر صارفین کو کافی میں موجود زہریلے کیمیکل کے بارے میں آگاہ نہ کرنے پر مقدمہ کیا ہے۔

اس گروپ کا کہنا ہے کہ ایکرائل امائیڈ جو کہ کافی کو روسٹ کرنے کے دوران پیدا ہوتا ہے کو کیلیفورنیا کے قوانین کے تحت (کارسینوجینک) کینسر کا موجب سمجھا جاتا ہے۔

’روزانہ تین سے چار کپ کافی پینے سے طبی فوائد‘

کافی پینے والے شاید لمبی عمر پاتے ہیں

کیا لندن میں بسیں اب کافی پر چلیں گی؟

سنہ 2016 میں عالمی ادارہ صحت کی جانب سے (کارسینوجینک) کی ممکنہ فہرست میں سے کافی کو نکال دیا گیا ہے تاہم اس کے باوجود لاس اینجلس کی عدالت کی طرف سے ایسا فیصلہ آیا ہے۔

خبر راساں ادارے روئٹرز کے مطابق ان کمپنیوں کو ممکنہ طور پر لاکھوں ڈالر جرمانہ بھی کیا جا سکتا ہے۔

بدھ کو سپیریئر کورٹ کے جج ایلیہو برلے نے فیصلہ سناتے ہوئے کہا کہ سٹار بکس سمیت کئی دیگر کمپنیاں (کارسینوجینک) سے خطرے کے بارے میں آگاہ کرنے میں ناکام رہی ہیں۔

تصویر کے کاپی رائٹ Getty Images

جن کمپنیوں پر مقدمہ کیا گیا ہے ان کے پاس اپیل کرنے کے لیے 10 اپریل تک کا وقت ہے۔

سٹار بکس نے اس پر تبصرہ کرنے سے انکار کرتے ہوئے صحافیوں کو نیشنل کافی ایسوسی ایشن (این سی اے) کے اس بیان کو پڑھنے کا کہا جس میں کہا گیا ہے کہ کافی کی صنعت اس فیصلے کے خلاف اپیل کرنے اور دیگر قانونی کارروائی کرنے کے بارے میں سوچ رہی ہے کیونکہ بقول ان کے کینسر کے حوالے سے کافی پر لگائے جانے والا ’وارننگ لیبل‘ گمراہ کن ہو سکتا ہے۔

این سی اے کے بیان کے مطابق ’امریکی حکومت کی اپنی غذائی ہدایت میں کافی کو صحت مند بتایا گیا ہے۔‘

دوسری جانب ڈنکن ڈونٹس، مک ڈونلڈز کارپوریشن، پیٹس اور کافی فروخت کرنے والے دیگر برینڈز کے حکام نے بھی اس حوالے سے تاحال کچھ نہیں کہا ہے۔

یہ مقدمہ کونسل فار ایڈجوکیشن اینڈ ریسرچ آن ٹاکسکس نے سنہ 2010 میں کیا تھا جس میں انھوں نے کہا تھا کہ ان میں سے ہر کمپنی پر 2002 سے کیلیفورنیا میں ان کی دکانوں پر آنے والے ہر گاہک کے بدلے 2500 ڈالر جرمانہ کیا جانا چاہیے۔

یہ جرمانہ عدالتی کارروائی کے اگلے مرحلے میں بڑھ بھی سکتا ہے۔

اسی بارے میں