پاکستان میں معمول سے زیادہ برفباری اور بارشیں سردیوں کا دورانیہ طویل

سردی کی شدت تصویر کے کاپی رائٹ Getty Images
Image caption اس سال موسم سرما میں پہاڑوں پر ہونے والی برف باری نے گذشتہ 70 سال کا ریکارڈ توڑا ہے

پاکستان میں اس برس موسم سرما میں ملک کے مختلف حصوں میں 50 فیصد زیادہ برفباری اور بارشیں معمول سے 25 سے 30 فیصد زیادہ ریکارڈ کی گئی ہیں جن کی بنا پر ملک کے پانی ذخیرہ کرنے والے بڑے ڈیموں تربیلا اور منگلا میں سطح آب بھی معمول سے زیادہ ہے۔

پاکستان کے محکمۂ موسمیات کے چیف میٹرولوجسٹ ڈاکٹر حنیف نے بی بی سی کو بتایا کہ مالاکنڈ، ہزارہ ڈویژن، مری، گلگت بلتستان اور پاکستان کے زیرِ انتظام کشمیر میں 22.5 انچ برف پڑ چکی ہے اور مارچ میں موسم سرما کے اختتام تک یہ بڑھ کر 50 انچ تک ہو جائے گی۔

انھوں نے موسم کی اس تبدیلی جس سے عام لوگ کسی حد تک پریشان بھی ہوئے ہیں ملک کی معیشت کے لیے مثبت قرار دیا اور کہا کہ اس کی وجہ سے دریاؤں میں زیادہ پانی آنے کی توقع ہے۔

ایک اور موسمیاتی ماہر اور پی ایم ڈی کے ڈائریکٹر خالد ملک نے ایک مقامی ٹی وی چینل کو بتایا کہ گذشتہ سال 70فیصد کم برفباری ہوئی۔

انھوں نے گذشتہ برسوں کا ریکارڈ دیتے ہوئے بتایا کہ سنہ 2004 اور 2005 کے موسم سرما میں ملک میں مجموعی طور پر 81 انچ برف پڑی تھی جبکہ گزشتہ دو برس میں یعنی 2016-17 میں 44 انچ اور 2017-18 میں 17.5 انچ برف ریکارڈ کی گئی تھی۔

گذشتہ چند برسوں میں کم برفباری کی وجہ سے موسم سرما کے دورانیے میں کمی دیکھنے میں آئی تاہم اس بار دسمبر سے شروع ہونے والی سردی اب تک جاری ہے جس میں خاصی شدت بھی آئی ہے۔

ماہرین کے مطابق شدید سردی اور غیر معمولی بارشوں کا یہ سلسلہ مارچ کے وسط تک وقفے وقفے سے جاری رہے گا۔

سردی کے طویل دورانیے کی وجہ کیا ہے؟

محکمہ موسمیات پاکستان کے چیف میٹرولوجسٹ ڈاکٹر حنیف موسم میں اس غیر معمولی تبدیلی کا ذمہ دار صرف عالمی ہدت کو نہیں سمجھتے۔

ان کا کہنا ہے کہ یہ غیر معمولی تبدیلی دنیا بھر میں دیکھی گئی ہے جس کی وجہ اوزون میں تبدیلی کے باعث بالائی فضا کا گرم ہو جانا ہے جس سے نہ صرف پاکستان بلکہ دنیا بھر کے موسم میں شدید تبدیلی آئی ہے۔

یہ بھی پڑھیے

’سنہ 2100 تک ہمالیہ،ہندوکش کے 36 فیصد گلیشیئر ختم ہو جائیں گے‘

موسمیاتی تبدیلی: ’زندگیاں بدلنے والی‘ رپورٹ متوقع

’سردی آ نہیں رہی۔۔۔۔ سردی آ گئی ہے!‘

تصویر کے کاپی رائٹ Getty Images

بارش اور برفباری کا 'غیر معمولی' سلسلہ

ماہرین کے مطابق رواں موسم سرما میں بارش اور برفباری کا آغاز دیر سے ہونے کے باوجود بارشیں اور برفباری معمول سے زیادہ ہوئی ہیں۔

چیف میٹرولوجسٹ ڈاکٹر حنیف کہتے ہیں کہ اس مرتبہ بارشیں معمول سے 25 سے 30 فیصد زیادہ جبکہ برفباری 50 فیصد زیادہ ہوئی ہے۔

انھوں نے بتایا کہ موسم سرما کے دوران مری میں اوسطاً چار فٹ تک برفباری ہوتی ہے لیکن اس مرتبہ مری اور گلیات میں تقریبا چھ فٹ تک برفباری ہو چکی ہے۔

ڈاکٹر حنیف نے بتایا کہ آنے والے چار سے پانچ ہفتوں میں بارش اور برفباری کے مزید تین سے پانچ سلسلے متوقع ہیں۔

محکمہ موسمیات پاکستان کے سابق ڈائریکٹر جنرل ڈاکٹر غلام رسول کے مطابق رواں موسم سرما کے دوران پہاڑوں پر ہونے والی برف باری نے گذشتہ 70 سال کا ریکارڈ توڑا ہے۔

ان کا کہنا ہے کہ دسمبر تک منگلا اور تربیلا ڈیم میں پانی کی سطح ڈیڈ لیول پر پہنچ گئی تھی تاہم حالیہ بارشوں سے صورت حال میں کافی بہتری آئی ہے جس کے اثرات فصلوں پر نمایاں ہوں گے۔

تصویر کے کاپی رائٹ Getty Images

یہ سردیاں ماضی کی سردیوں سے کیسے مختلف ہیں؟

چیف میٹرولوجسٹ ڈاکٹر حنیف نے بتایا کہ پچھلے کئی برسوں میں سردیوں کا دورانیہ انتہائی کم رہ گیا تھا تاہم اس بار ملک بھر میں سرد موسم کا دورانیہ نہ صرف طول پکڑ گیا بلکہ اس کی شدت میں بھی اضافہ ہوا ہے۔

اس سے قبل پاکستان میں سردی کا دورانیہ تقریباً دو سے تین ہفتے تک ہی جاری رہتا تھا لیکن اس بار سرد موسم کا ساتواں ہفتہ جاری ہے۔ کراچی میں دو ہفتے تک رہنے والا موسم سرما اس بار پانچویں ہفتے میں بھی جاری ہے۔

’بہار`کب آئے گی؟

ڈاکٹر حنیف کے مطابق پاکستان کے جنوبی علاقوں یعنی سندھ اور بلوچستان میں موسم بہار کا آغاز فروری کے تیسرے ہفتے میں جبکہ جنوبی پنجاب اور خیبرپختونخوا کے جنوبی علاقوں میں فروری کے چوتھے ہفتے سے ہو گا۔

لاہور اور اسلام آباد سمیت پاکستان کے بالائی علاقوں میں مارچ کے پہلے ہفتے اور شمالی علاقہ جات میں اپریل کے آخری ہفتے میں بہار کی آمد متوقع ہے۔

تصویر کے کاپی رائٹ Getty Images

کم سے کم درجہ حرارت کتنا رہا؟

محکمۂ موسمیات کی جانب سے فراہم کردہ اعداد و شمار کے مطابق 16 سال بعد کم سے کم درجۂ حرارت اس بار سکردو میں منفی 20 ڈگری سینٹی گریڈ ریکارڈ کیا گیا جبکہ شمالی علاقوں میں درجۂ حرارت اس وقت بھی نقطۂ انجماد سے کم ہے۔

آئندہ برس موسم سرما کیساہو گا؟

ڈاکٹر حنیف کے مطابق آئندہ سال سردی کا موسم کتنا طویل اور شدید ہو گا اس بارے میں ابھی کچھ کہنا ممکن نہیں تاہم رواں برس موسم سرما پاکستان سمیت دنیا بھر میں ’غیر معمولی‘ ضرور رہا ہے۔

اسی بارے میں