فلاپی ڈسک کی فروخت بند کرنے کا فیصلہ

دنیا کی چند بڑی الیکٹرانک کمپنیوں میں شامل کمپنی سونی کا کہنا ہے کہ وہ مارچ سنہ 2011 سے جاپان میں فلاپی ڈسک کی فروخت بند کر دے گی۔

سالِ رواں کے آغاز میں سونی نے زیادہ تر بین الاقوامی مارکیٹوں میں اس تیس برس قدیم ڈیٹا سٹوریج نظام کی فروخت بند کر دی تھی۔

فلاپی ڈسک کے استعمال میں کمی سنہ 1998 میں اس وقت آنا شروع ہوئی تھی جب ایپل نے یہ اعلان کیا تھا کہ وہ اپنے جی تھری آئی میک کمپیوٹر میں فلاپی ڈرائیو نہیں لگائے گا۔

اس کے بعد سے متعدد دوسری کمپنیوں نے بھی اس پر عمل شروع کیا اور ڈیل نے سنہ 2003 میں اپنے کمپیوٹرز میں فلاپی ڈرائیو لگانے کا عمل ترک کر دیا۔

یہی نہیں بلکہ سنہ 2007 میں کمپیوٹر مصنوعات فروخت کرنے والے سٹور پی سی ورلڈ نے بھی فلاپی ڈرائیوز کی فروخت منقطع کر دی۔

تاہم اس سب کے باوجود سونی یہ ڈسکس اور ڈرائیوز فروخت کرتا رہا۔

تاہم اب سنہ 1981 میں ساڑھے تین انچ کی پہلی فلاپی ڈسک بنانے والی اس کمپنی نے آن لائن سٹوریج اور یو ایس بی ڈرائیوز کی مقبولیت کی وجہ سے فلاپی ڈسک کی تیاری اور فروخت مکمل طور پر ختم کرنے کا فیصلہ کیا ہے۔