زیادہ بولنے والوں کو خاموش کرنے کا آلہ

تصویر کے کاپی رائٹ BBC World Service
Image caption سپيچ جیمر نام کا آلہ زیادہ بولنے والوں کو اچانک خاموش کر سکتا ہے

جاپان کے سائنسدانوں کا دعوٰی ہے کہ انہوں نے ایک ایسا آلہ تیار کیا ہے جس سے کسی بھی فرد کی بولنے کی صلاحیت کو اچانک روکا جا سکتا ہے۔

خبر رساں ایجنسی پی ٹی آئی کے مطابق سائنسدانوں کا کہنا ہے کہ سپيچ جیمر نام کا یہ آلہ زیادہ بولنے والوں کو اچانک خاموش کر سکتا ہے چاہے وہ کسی میٹنگ یا فلم کے دوران شور کر رہے ہوں یا پھر لائبریری میں فون پر اونچی آواز میں بات کر رہے ہوں۔

اس آلے کو بنانے والوں نے ماہرین نفسیات کی اس دریافت کا فائدہ اٹھایا ہے کہ جب آپ ہی کے الفاظ صرف ایک سیكنڈ کی تاخیر کے بعد دوہرائے جاتے ہیں تو آپ بات کرنے میں تقریباً غیر فعال ہو جاتے ہیں۔

اس آلے کو ہاتھ میں پکڑا جا سکتا ہے۔ اس میں ایک مائیکروفون اور سپیکر ہے جو بولنے والے کی آواز کو ریکارڈ کرتا ہے۔

سائنسدانوں کا کہنا ہے کہ یہ اس آواز کو سپیکر کو بھیج دیتا ہے اور اسے 0.2 سیكنڈ کی تاخیر کے بعد دوبارہ سناتا ہے۔

مائیکروفون اور سپیکر کی ایک سمت ہوتی ہے اور دور سے ہی اسے بندوق کی طرح بولنے والے کی طرف کیا جا سکتا ہے۔

اسی بارے میں