کوالا کی نسل بچانے کی مہم

کوالا
Image caption کوالا آسٹریلیا کی ایک اہم شناخت ہے جو سیاحوں میں بھی انتہائی مقبول ہے

آسٹریلیا میں کوالا کو ملک کے کچھ حِصوں میں معدوم ہوتی ہوئی نسلوں کی فہرست میں شامل کر دیا گیا ہے۔

ماحولیات کے وزیر ٹونی برک نے بتایا کہ کوینزلینڈ، نیو ساؤتھ ویلز اور آسٹریلین کیپیٹل ٹیریٹری میں کوالا خطرے سے دوچار ہے۔

انہوں نے بتایا کہ شہری علاقوں کی حدود کا پھیلنا، گاڑیوں سے ٹکرانے کے واقعات، کتوں کےحملے اور ان کی افزائش کے قدرتی ماحول کا ختم ہونا ان کی آبادی کی کمی کی وجہ بن رہا ہے۔

ماحولیات کے تحفظ کے لیے کام کرنے والے ماہرین کا کہنا ہے کہ حکومت کو یہ اعلان پورے ملک کے لیے کرنا چاہیے تھا۔ عام خیال کے بر عکس آسٹریلیا کا مقامی جانور کوالا ریچھ کی نسل نہیں ہے۔ یہ صرف سفیدے کے پتے کھاتے ہیں اور دن میں بیس گھنٹے سو کر گزارتے ہیں۔

بی بی سی کے نامہ نگار نے بتایا کہ کوالا کی درست تعداد کے بارے میں کچھ نہیں کہا جا سکتا لیکن مختلف اندازوں کے مطابق آسٹریلیا میں ان کی آبادی چند ہزار سے لے کر تینتالیس ہزار تک ہو سکتی ہے۔

نیو ساؤتھ ویلز اور کوینز لینڈ میں کوالا کی تعداد انیس سو نوّے کے بعد سے چالیس فیصد کم ہوئی ہے۔ اس کے برعکس وکٹوریا اور اور جنوبی آسٹریلیا کی ریاستوں میں کوالا کی نسل پھل پھول رہی ہے۔

اسی بارے میں