گوگل ٹیلی ویژن کی دنیا میں داخل

انٹرنیٹ کے ایک بڑے گروپ گوگل نے اپنے حریف اپیل ٹی وی کے مقابلے میں نسبتاً سستی ’کروم کاسٹ‘ ڈیوائس متعارف کروائی ہے۔

اس ڈیوائس کو ٹیلی ویژن کی ایچ ڈی ایم آئی پورٹ میں لگانے سے ٹی وی پر یو ٹیوب اور نیٹ فلکس سے ویڈیوز براہِ راست سٹریم کی جا سکیں گی۔

گوگل نے اس ڈیوائس کو فوری طور پر امریکہ میں متعارف کروا دیا ہے اور اس کی تعارفی قیمت 35 ڈالر ہو گی۔

گوگل نے ابھی اس ڈیوائس کو بین الاقوامی طور پر متعارف کروانے میں کچھ نہیں بتایا۔

ادھر گوگل نے نیکسس 7 ٹیبلٹ کو بھی اپ گریڈ کرنے کا اعلان کیا ہے۔

خیال رہے کہ گوگل نے کروم کاسٹ متعارف کروا کر ٹیلی ویژن کی صنعت میں قدم رکھ دیا ہے جس میں منافع کمانے کے بے تحاشا مواقع موجود ہیں۔

گوگل نے اس سے قبل سنہ 2012 میں ٹی وی کی دنیا میں داخل ہونے کی ایک کوشش کی تھی۔ اس وقت گوگل نے اپنے پارٹنر سونی کے ساتھ مل کر 200 پاؤنڈ کا ایک سیٹ باکس تیار کیا تھا، تاہم اسے خاطر خواہ کامیابی نہیں ملی تھی۔

اس سے پہلے سنہ 2010 کے اوائل میں گوگل نے ٹی وی کی دنیا میں داخل ہونے کی کوشش کی تھی اور اس نے ’گوگل ٹی وی‘ شروع کیا تھا تاہم متعدد ٹی نیٹ ورکس نے اس کی سروس کو بلاک کر دیا تھا۔

گوگل ٹی وی کے ناکام ہونے کی دوسری بڑی وجہ صارفین کی جانب سے مہنگے ہارڈ وئیر کی خریداری میں ہچکچاہٹ تھی۔

گوگل کی جانب سے گذشتہ برس اعلان کردہ نیکسس کیو ڈیوائس کو بھی فوری طور پر صارفین کی فیڈ بیک کی وجہ سے واپس لے لیا گیا تھا۔

’کروم کاسٹ‘ کو شروع کر کے گوگل اپنی بڑی سکرین کی آفر کو مزید آسان بنانا چاہتا ہے اور اپنے صارفین کو اس کے ذریعے یو ٹیوب اور نیٹ فلکس کی ویڈیوز کو سستی ڈیوائس کے ذریعے فراہم کرنا چاہتا ہے۔

ڈونگل کو ٹیلی ویژن کی ایچ ڈی ایم آئی پورٹ میں لگا کر وائر لیس ہوم انٹرنیٹ ڈیوائس کی طرح چلایا جا سکے گا۔

گوگل کا کہنا ہے کہ ان کی ڈیوائس کے ذریعے صارفین اعلیٰ کوالٹی کا حامل ٹی وی دیکھ سکیں گے اور اس کی بیٹری بھی دیرپا ہو گی۔

تجزیہ کار کیرولینا میلانیسی کا کہنا ہے کہ گوگل کی یہ نئی ڈیوائس ان کی حکمتِ عملی کا اہم حصہ ہے۔ انھوں نے بی بی سی کو بتایا یہ ڈیوائس نیکسس کیو سے بہت مختلف ہے، اور اس کا مقصد یوٹیوب پر توجہ مرکوز کروانا ہے۔

نیکسس 7 ٹیبلٹ کے اپ گریڈ کے حوالے سے گوگل کا کہنا ہے کہ اس نئی ٹیبلٹ کی فروخت آئندہ آنے والے ہفتوں میں شروع کر دی جائے گی۔

گوگل کے مطابق یہ ٹیبلٹ 4.3 اینڈرائیڈ چلانے والی پہلی ٹیبلٹ ہو گی۔

گوگل کا نیا نیکسس 7 اپنے پیش رو سے 30 ڈالر زیادہ مہنگا ہو گا۔

اسی بارے میں