نیا آئی پیڈ، دنیا کی پتلی ترین ٹیبلٹ

تصویر کے کاپی رائٹ apple
Image caption ایپل کے مطابق اس نے اس سال اپریل تا جون کی سہ ماہی میں ایک کروڑ 33 لاکھ آئی پیڈ فروخت کیے ہیں، جوگذشتہ سال اسی سہ ماہی کے مقابلے پر نو فیصد کی کمی ہے

ایپل نے آئی پیڈ کا نیا ورژن آئی پیڈ 2 متعارف کروایا ہے اور کہا ہے کہ یہ دنیا کا پتلا ترین آئی پیڈ ہے۔

یہ آئی پیڈ 6.1 ملی میٹر موٹا ہے اور اس میں ٹچ آئی ڈی فنگر پرنٹ سینسر نصب کیا گیا ہے۔ اس کے علاوہ اس میں پہلی بار اینٹی ریفلیکٹیو کوٹنگ استعمال کی گئی ہے جو دن کی روشنی میں بھی سکرین کو سہولت سے دیکھنے میں مدد دیتی ہے۔

تاہم بعض ماہرین نے سوال اٹھایا ہے کہ آیا یہ نئے فیچر آئی پیڈ کی فروخت میں آنے والی کمی کو روکنے میں مددگار ثابت ہوں گے۔

اس کے علاوہ آئی پیڈ منی کا نیا ورژن بھی متعارف کروایا گیا ہے جسے آئی پیڈ منی 3 کا نام دیا گیا ہے۔ اپنے بڑے بھائی کی طرح اس میں بھی فنگر پرنٹ سینسر نصب ہے، تاہم اس میں پرانا A7 پروسیسر ہے اور اس کا کیمرا بھی نسبتاً کم ریزولوشن والا ہے۔

ایپل کے مطابق اس نے اس سال اپریل تا جون کی سہ ماہی میں ایک کروڑ 33 لاکھ آئی پیڈ فروخت کیے ہیں۔ یہ گذشتہ سال اسی سہ ماہی کے مقابلے پر نو فیصد کی کمی ہے۔

اسی دوران ایپل کے آئی فون اور میک کمپیوٹروں کی فروخت میں اضافہ ہوا ہے۔ اس کے علاوہ آئی پیڈ کے مارکیٹ کا حصہ گذشتہ سال کے 33 فیصد کے مقابلے کم ہو کر 26.9 فیصد رہ گیا ہے۔

اس دوران دنیا بھر میں ٹیبلٹس کی فروخت میں 11 فیصد کا اضافہ دیکھنے میں آیا ہے۔

آئی ڈی سی کے جتیش اربانی نے خیال ظاہر کیا کہ ایپل نے گذشتہ ماہ بڑی سکرین والا آئی فون لانچ کیا تھا جو آئی پیڈ کی فروخت کو مزید کم کر سکتا ہے:

’ان بڑے آئی فونز کے پیشِ نظر اب ایپل کو ایک ایسی مارکیٹ دیکھنا ہو گی جہاں آئی پیڈ منی فٹ ہو سکے۔‘

آئی پیڈ 2 کے دوسرے نئے فیچرز میں آٹھ میگا پکسل کا کیمرا شامل ہے جو سلو موشن ویڈیو بنا سکتا ہے۔

ٹیبلٹس کے علاوہ ایپل نے نئے آئی میک کمپیوٹر بھی متعارف کروائے ہیں جس کے بارے میں اس نے کہا ہے کہ ان کی سکرینیں سب سے زیادہ ریزولوشن والی ہیں۔

اس 27 انچ والے کمپیوٹر کی سکرین کو 5K کا نام دیا گیا ہے اور اس میں ایچ ڈی ٹی وی کے مقابلے پر ’پانچ گنا زیادہ پکسل‘ موجود ہیں۔

اسی بارے میں