انجن ڈرائیور کو انجینيئر کیوں کہا جاتا ہے؟

تصویر کے کاپی رائٹ thnkstock
Image caption امریکہ میں ٹرین انجن کے تعلق سے اس کے چلانے والے کو لغوی انداز میں انجینیئر کہتے ہیں

امریکہ میں ٹرین چلانے والے کو ڈرائیور کے بجائے انجینيئر کیوں کہا جاتا ہے؟

گذشتہ ہفتے فیلاڈیلفیا میں ایمٹریک ٹرین حادثے کے بعد یہ بات کھل کر سامنے آئی ہے۔

اگرچہ آج ٹرین ڈرائیوروں کے لیے ’انجینئیر‘ کا استعمال برطانیہ کے علاوہ بہت سارے خطے میں کانوں کو غیر مانوس لگے لیکن 19 ویں صدی میں برطانیہ میں بھی کچھ دنوں کے لیے انھیں انجینیئر کہا گیا تھا۔

’انجینیئر‘ کا استعمال ایسے شخص کے لیے ہوتا ہے جو کسی قسم کی مشین یا انجن کا ڈیزائن بنائے یا اسے تیار کرے اور اس کا استعمال 13 ویں صدی سے جاری ہے اور آج تک اسے برطانیہ اور امریکہ سمیت دنیا کے بیشتر ممالک میں اسی طرح ہو رہا ہے۔

تصویر کے کاپی رائٹ BBC World Service
Image caption ریل گاڑی چلانے والے کے لیے ڈکشنری میں ڈرائیور کے علاوہ انجینیئر کا بھی ذکر ہے

لیکن برطانوی ماہر لغات سوزی ڈینٹ کا کہنا ہے کہ ’اس کا استعمال کسی مشین کو ڈیزائن کرنے کے ساتھ ساتھ اس کے چلانے والے کے لیے بھی ہو سکتا ہے۔‘

سنہ 1730 کی دہائی سے شمالی امریکی انگریزی میں انجینیئر کا استعمال ’انجن مین‘ کے مترادف کے طور پر بطور خاص ڈرائیور یا فائر انجن کو چلانے والے کے لیے ہوتا رہا۔ اس کے بعد بھاپ سے چلنے والی کشتی اور ٹرین کے ڈرائیوروں کے لیے بھی ہونے لگا۔

آکسفورڈ انگلش ڈکشنری کے مطابق پہلے پہل ڈرائیور کے طور پر اس کا استعمال سنہ 1816 میں برطانیہ میں ہوا جب ایسیاٹک جرنل میں یہ بات سامنے آئی۔ اس میں لکھا تا کہ ’نیوکیسلم میں ایک شخص جو خود کو انجینیئر کہتا ہے کی غلطی سے ایک لوکوموٹِو انجن پھٹ گیا جس میں بہت سے لوگوں کی جانیں گئیں۔۔۔‘

سوزی ڈینٹ کا کہنا ہے کہ یہ استعمال بحراوقیانوس کے پار بھی گیا اور امریکی انجینیئرکا استعمال لغوی طور پر زیادہ کرتے ہیں۔

تصویر کے کاپی رائٹ
Image caption بچوں کے کارٹون کا جب امریکی انگریزی ترجمہ ہوا تو ڈرائیور کو انجینیئر کر دیا گیا

آج برطانیہ یا برصغیر میں کہیں بھی ڈرائیور کے لیے انجینیئر کے لفظ کا شاذ و نادر ہی استعمال ہوتا ہو تو ہو لیکن 19 ویں صدی میں وجود میں آنے والی ایک تنظیم کا نام ’ایسوسی ایٹیڈ سوسائٹی آف لوکوموٹیو انجینیئرز اینڈ فائر مین‘ (ایسلف) ابھی بھی نظر آتا ہے۔

ایسلف کے ایک ترجمان نے بتایا کہ اس نام میں اس وقت کا مستعمل مفہوم شامل ہے۔

آکسفورڈ انگلش ڈکشنری کی سابق ایڈیٹر جیسی شیڈلوور کا کہنا ہے کہ ’امریکی ٹرین چلانے والے کے لیے کبھی بھی ڈرائیور لفظ کا استعمال نہیں کریں گے بلکہ انھیں انجینیئر ہی کہیں گے۔ یہ امریکی انگریزی کی قدیم خصوصیت ہے اور اس کا استعمال سنہ 1830 کی دہائی کے اوائل سے ہو رہا ہے۔‘

اسی بارے میں