تین گھوڑوں کے گوبر سےگھر مکمل گرم

تصویر کے کاپی رائٹ Getty Images
Image caption مخلوط حکومت نے اپنے منشور میں توانائی کے متبادل ذرائع تلاش کرنے پر زور دیا ہے

یورپی ملک فِن لینڈ کی حکومت کی خواہش ہے کہ اپنے گھروں کو گرم رکھنے کے لیے لوگ کوئلے جیسے قدرتی وسائل کو چھوڑیں اور گھوڑوں کے گوبر کی جانب توجہ دیں۔

فن لینڈ کی قومی ریڈیو سروس کی اطلاعات کے مطابق حال ہی میں برسرِاقتدار آنے والی مخلوط حکومت نے اپنے منشور میں ملک کی توانائی کی ضروریات پوری کرنے کے لیے بڑے پیمانے پر گھوڑوں کا گوبر استعمال کرنے کے منصوبے کا اعلان کیا ہے۔

ناپید نہ ہونے والے وسائل سے توانائی حاصل کرنے کے اس حکومتی منصوبے سے پہلے ہی فِن لینڈ میں ایک کمپنی گھوڑوں کے گوبر کو ردی لکڑی کے ٹکڑوں کے ساتھ ملا کر ایک قسم کا ’بائیو فیول‘ یا ایندھن بنانے کی کوشش میں مصروف ہے۔ اس عمل میں لکڑی کے بُرادے کو گوبر میں ملا کر جلایا جاتا ہے اور اس سے خارج ہونے والی توانائی کو بطور ایندھن استعمال کیا جاتا ہے۔

مذکورہ کمپنی کا نام ’فورٹم گروپ‘ ہے اور اس کا کہنا ہے کہ ایک سال میں تین گھوڑوں کےگوبر سے اتنی توانائی حاصل ہوتی ہے جو ایک گھر کو سال بھر گرم رکھنے کے لیے کافی ہے۔ اس پیمانے کو اگر صنعتی سطح پر استعمال کیا جائے تو فِن لینڈ میں 77 ہزار گھوڑوں سے اتنا گوبر مل سکتا ہے جس سے 20 ہزار گھروں کو مکمل گرم رکھا جا سکتا ہے اور ان گھروں کو کوئلے، بجلی یا گیس وغیرہ پر انحصار کی ضرورت نہیں رہے گی۔

Image caption فِن لینڈ کا شمار یورپ کے سرد ترین ممالک میں ہوتا ہے

مخلوط حکومت کے وزراء کے بقول ان کی خواہش ہے کہ فِن لینڈ کوئلہ جلانا ترک کر دے اور آنے والے برسوں میں تیل کی درآمد نصف کر دے۔ اسی خیال کے تحت حکومت توانائی کے متبادل ذرائع دریافت کرنے کی کوشش کر رہی ہے۔

ریڈیو سٹیشن کا کہنا تھا کہ گھوڑوں کے گوبر سے توانائی حاصل کرنے سے نہ صرف قدرتی وسائل پر دباؤ کم ہوگا بلکہ اس سے ملک میں گھوڑوں کے استبلوں کے بڑھتے ہوئے مسائل کے حل میں بھی مدد ملے گی اور انھیں گوبر تلف کرنے میں جن مشکلات کا سامنا کرنا پڑ رہا ہے ان کا حل بھی نکل سکتا ہے۔

یاد رہے کہ فِن لینڈ کی حکومت گوبر کو ایسے کھیتوں میں بطور کھاد استعمال کرنے پر پہلے ہی پابندی لگا چکی ہے جہاں سے خارج ہونے والا اضافی پانی دریاؤں اور پینے کے پانی کے دیگر ذخائر میں شامل ہونے کا اندیشہ ہوتا ہے۔ اس کے علاوہ جلد ہی حکومت ان مقامات پر گوبر پھینکنے پر بھی پابندی لگا رہی ہے جہاں دیگر کوڑا کرکٹ پھینکا جاتا ہے۔

اسی بارے میں