ممبئی ٹیسٹ کا پہلا دن نوجوان جیننگز کے نام

کرکٹ تصویر کے کاپی رائٹ Reuters
Image caption کیٹن جیننگز نے کامیابی سے اپنے پہلے ٹیسٹ میچ میں سینچری مکمل کی

انڈیا اور انگلینڈ ‌کے مابین پانچ کرکٹ ٹیسٹ میچوں کی سیریز کے چوتھے میچ کے پہلے دن کھیل کے اختتام تک مہمان ٹیم نے اپنی پہلی اننگز میں پانچ وکٹوں کے نقصان پر 288 رنز بنا لیے تھے۔

پہلے دن کے کھیل کے خاص بات اپنا پہلا ٹیسٹ میچ کھیلنے والے انگلش بیٹسمین کیٹن جیننگز کی عمدہ سینچری تھی۔

میچ کا تفصیلی سکور کارڈ

جمعرات سے ممبئی کے ونکھیڈے سٹیڈیم میں شروع ہونے والے ٹیسٹ میچ کے پہلے دن جب کھیل ختم ہوا تو بین سٹوکس 25 اور جوز بٹلز 18 رنز کے ساتھ کریز پر موجود تھے۔

انگلیڈ کے کپتان ایلسٹر کک نے ٹاس جیت کر پہلے بیٹنگ کا فیصلہ کیا اور اپنا ٹیسٹ میچ کھیلنے والے کیٹن جیننگز کے ساتھ 99 رنز کا آغاز فراہم کیا۔ کک 42 رنز بنا کر آؤٹ ہوئے۔

دوسرے آؤٹ ہونے والے کھلاڑی جو روٹ تھے جنھوں نے 21 رنز بنائے۔

اس کے بعد معین علی اور کیٹن جیننگز نے عمدہ شراکت قائم کرتے ہوئے سکور میں 94 رنز کا اضافہ کیا۔

معین علی نے 50 رنز بنائے اور کیٹن جیننگز نے کامیابی سے اپنے پہلے ٹیسٹ میچ میں سینچری مکمل کی اور 112 رنز بنا کر آؤٹ ہوئے۔

تصویر کے کاپی رائٹ Reuters
Image caption انڈیا کی جانب سے ایشون ایک بار پھر سب سے کامیاب بولر ہے

تاہم چائے کے وقفے کے بعد روی چندرن ایشون نے انگلینڈ کے تین کھلاڑیوں کو آؤٹ کر کے اپنی ٹیم کو میچ میں واپس آنے میں مدد فراہم کی۔

انڈیا کی جانب سے ایشون ایک بار پھر سب سے کامیاب بولر رہے اور چار کھلاڑیوں کا آؤٹ کیا جبکہ ایک وکٹ رویندر جاڈیجہ کے حصے میں آئی۔

خیال رہے کہ پانچ ٹیسٹ میچوں کے سیریز میں انڈیا کا دو صفر کی برتری حاصل ہے۔ راجکوٹ میں کھیلا گیا پہلا ٹیسٹ بغیر کسی نتیجے کے ختم ہوگیا تھا جبکہ موہالی اور وشاکھاپٹنم میں انڈیا نے فتح اپنے نام کی تھی۔

متعلقہ عنوانات

اسی بارے میں