فٹبال ورلڈکپ کی ٹیمیں 32 سے بڑھا کر 48 کیے جانے کا امکان

ورلڈ کپ تصویر کے کاپی رائٹ Getty Images

فٹبال کے عالمی نگراں ادارے فیفا کی رولنگ کونسل ورلڈ کپ میں شرکت کرنے والی ٹیموں کی تعداد 32 سے بڑھا کر 48 کرنے کے بارے میں فیصلہ کرے گی۔

یہ فیصلہ منگل کو ہونے والےایک اجلاس میں کیا جائے گا۔

اگر یہ فیصلہ ہو جاتا ہے تو ورلڈ کپ میں شرکت کرنے والے نئی 16 ٹیموں میں افریقی اور ایشیائی ٹیموں کی شمولیت کے امکانات روشن ہو جائیں گے۔

پہلے مرحلے میں تین ٹیموں پر مشتمل 16 گروپس ہوں گے جس کے بعد ناک آؤٹ کا مرحلہ کھیلا جائے گا۔

یورپی ممالک کے اہم فٹبال کلبز نے ان تبدیلیوں کی مخالفت کی ہے اور خدشہ ظاہر کیا ہے کہ کھلاڑیوں کو ایک سیزن کے دوران بہت زیادہ میچز کھیلنے پڑیں گے۔

لیکن بی بی سی کی دیکھی ہوئی فیفا کی ایک خفیہ رپورٹ کے مطابق نئے فارمیٹ کے مطابق ورلڈ کپ 32 دنوں پر محیط ہوگا اور فائنل میں پہنچنے والی دونوں ٹیمیں سات میچز کھیلیں گی۔ موجودہ فارمیٹ میں بھی فائنل میں پہنچنے والی ٹیمیں سات میچز ہی کھیلتی ہیں۔

تصویر کے کاپی رائٹ Getty Images
Image caption فیفا کے صدر جیانی انفینٹینو کو امید ہے کہ آئندہ ورلڈ کپ میں 48 ٹیمیں شرکت کر سکیں گی

اس نئے فارمیٹ کے مطابق یہ خیال ظاہر کیا جا رہا ہے کہ 16 اضافی ٹیموں کے باوجود کھیل کا معیار خراب نہیں ہوگا اور ساتھ ساتھ فیفا کو تقریبا ایک ارب ڈالر کی اضافی آمدنی بھی ہوگی۔

نئے فارمیٹ کی ایک اور تجویز کے مطابق پہلے مرحلے کے مقابلوں میں میچ برابر ہونے کی صورت میں پنالٹی شوٹ آؤٹ ہوگا تاکہ اس بات کو یقینی بنایا جاۓ کہ تمام میچوں کا واضع نتیجہ سامنے آئے۔

اجلاس میں یہ فیصلہ بھی لیا جائے گا کہ 16 ٹیموں کو کس حساب سے بڑھایا جائیگا۔ خیال ظاہر کیا جا رہا ہے کہ یورپی ممالک کی فٹبال تنظیم یویئفا نئے فارمیٹ کی حمایت اس شرط پر کرے گی کہ ورلڈ کپ میں ان کو 13 کے بجاِۓ 16 ٹیمیں کھلانے کی اجازت دی جائے۔

48 ٹیموں کے ٹورنامنٹ کو مکمل کرنے کے لیے 32 دن درکار ہوں گے جس میں 12 دن پہلے مرحلے کے لیے مختص ہوں گے جبکہ 20 دن ناک آؤٹ مرحلے کے لیے ہوں گے۔ ٹورنامنٹ میں کُل 80 میچز کھیلے جائیں گے۔

متعلقہ عنوانات

اسی بارے میں