پی ایس ایل میچ فکسنگ، برطانیہ میں بھی دو افراد گرفتار

ناصر جمشید تصویر کے کاپی رائٹ AFP
Image caption پی سی بی نے سابق اوپنر ناصر جمشید کو انسدادِ بدعنوانی ضابطۂ اخلاق کی خلاف ورزی پر عارضی طور پر معطل کر کے تمام فارمیٹس کی کرکٹ میں حصہ لینے سے روک دیا ہے

برطانیہ کی نیشنل کرائم ایجنسی نے عالمی کرکٹ میں میچ اور سپاٹ فکسنگ کے معاملے میں جاری تحقیقات کے تناظر میں دو افراد کو حراست میں لینے کی تصدیق کی ہے۔

بی بی سی کو معلوم ہوا ہے کہ ان میں سے ایک شخص پاکستانی کرکٹر ناصر جمشید ہیں۔

اطلاعات کے مطابق ان گرفتاریوں کا تعلق پاکستان سپر لیگ میں جاری میچ فکسنگ سکینڈل سے ہے۔

پاکستان سپر لیگ سکینڈل، ناصر جمشید بھی معطل

عرفان سے تحقیقات جاری، شرجیل اور خالد کو نوٹس

سپر لیگ کے دوران ’بک میکرز سے رابطہ‘: عرفان، ذوالفقار، شاہ زیب سے پوچھ گچھ

سپر لیگ کے دوران ’بک میکرز سے رابطہ‘، شرجیل خان اور خالد لطیف معطل

نیشنل کرائم ایجنسی کے ایک ترجمان کا کہنا ہے کہ ان دونوں افراد کی عمر تیس سے چالیس برس کے درمیان ہے اور انھیں 13 فروری کو گرفتار کیا گیا تھا۔

ترجمان کا کہنا ہے کہ انھیں اب اپریل 2017 تک ضمانت پر رہائی دی جا چکی ہے۔

این سی اے کے بیان میں ان افراد کی شناخت ظاہر نہیں کی گئی اور نہ ہی یہ بتایاگیا ہے کہ ان کا تعلق کس ملک سے ہے۔

این اسے اے کا کہنا ہے کہ 'جاری تحقیقات کے سلسلے میں ہم پاکستان کرکٹ بورڈ اور عالمی کرکٹ کونسل کے اینٹی کرپشن یونٹس کے ساتھ مل کر کام کر رہے ہیں۔'

ادارے کے مطابق پاکستانی کرکٹ بورڈ اس سلسلے میں اپنی تحقیقات بھی کر رہا ہے جس کے نتیجے میں تین کھلاڑی معطل کیے گئے ہیں۔

تصویر کے کاپی رائٹ AFP

خیال رہے کہ پاکستان کرکٹ بورڈ نے بکیز سے روابط کے الزام میں اسلام آباد یونائیٹڈ کے دو بلے بازوں شرجیل خان اور خالد لطیف کو معطل کرنے کے بعد انھیں اظہارِ وجوہ کے نوٹس جاری کیے ہیں۔

پی سی بی کے مطابق ان دونوں کھلاڑیوں کے خلاف یہ کارروائی ایک بین الاقوامی سنڈیکیٹ سے مبینہ طور پر ان کے رابطے کے بعد عمل میں آئی تھی جو پاکستان سپر لیگ کو متاثر کرنے کی کوشش کر رہا تھا۔

ان کے علاوہ بورڈ نے سابق اوپنر ناصر جمشید کو بھی انسدادِ بدعنوانی ضابطۂ اخلاق کی خلاف ورزی پر عارضی طور پر معطل کر کے تمام فارمیٹس کی کرکٹ میں حصہ لینے سے روک دیا ہے۔

ان تین کھلاڑیوں کے علاوہ فاسٹ بولر محمد عرفان کے خلاف تحقیقات جاری ہیں۔

اسی بارے میں