بین سٹوکس آئی پی ایل کے سب سے مہنگے غیرملکی کھلاڑی

بین سٹوکس تصویر کے کاپی رائٹ AP
Image caption پونے کی ٹیم نے بین سٹوکس کی خدمات ساڑھے 14 کروڑ روپے میں حاصل کیں ہیں

انڈین پریمیئر لیگ کے دسویں ایڈیشن کے لیے ہونے والی نیلامی میں پونے واریئرز کی ٹیم نے انگلینڈ کے آل راؤنڈر بینجمن سٹوکس کی خدمات ساڑھے 14 کروڑ روپے کے عوض حاصل کر لی ہیں۔

آئی پی ایل کے منتظمین نے بین سٹوکس کی ابتدائی قیمت دو کروڑ روپے رکھی تھی تاہم ساڑھے 21 لاکھ امریکی ڈالر کے مساوی رقم کی اس بولی کے نتیجے میں بین سٹوکس آئی پی ایل کی تاریخ کے سب سے مہنگے غیر ملکی کھلاڑی بن گئے ہیں۔

آئی پی ایل کی تاریخ میں مجموعی طور پر سب سے مہنگے کھلاڑی ہونے کا اعزاز انڈیا کے یوراج سنگھ کے پاس ہے جن کی خدمات گذشتہ برس 16 کروڑ روپے کے عوض حاصل کی گئی تھیں۔

جنوبی انڈیا کے شہر بنگلور میں ہونے والی نیلامی میں 351 کھلاڑیوں کو شامل کیا گیا ہے جن میں سے 122 غیر ملکی کھلاڑی ہیں۔ نیلامی میں ان میں سے صرف 76 کھلاڑیوں کا ہی انتخاب ہونا ہے۔

پیر کو جاری نیلامی میں بین سٹوکس کے علاوہ ایک اور انگلش کرکٹر ٹائمل ملز کی خدمات حاصل کرنے کے لیے رائل چیلنجرز بنگلور نے بھی 12 کروڑ کی کامیاب بولی دی۔

دیگر غیرملکی کھلاڑیوں میں نیوزی لینڈ کے ٹرینٹ بولٹ اور جنوبی افریقہ کے فاسٹ بولر ربادا کو بالترتیب کولکتہ نائٹ رائیڈرز اور دہلی ڈیئرڈیولز نے پانچ، پانچ کروڑ میں خریدا ہے۔

دہلی ڈیئرڈیولز نے ہی ساڑھے چار کروڑ روپے کے عوض پیٹرک کمنز کی خدمات حاصل کی ہیں جبکہ کرس ووکس کے لیے کولکتہ نائٹ رائیڈرز نے چار کروڑ 20 لاکھ روپے کی کامیاب بولی دی۔

تصویر کے کاپی رائٹ Getty Images
Image caption افغانستان کے 18 سالہ لیگ سپنر راشد خان ارمان کے لیے سن رائزرز حیدرآباد نے کی بولی سب سے زیادہ رہی جس نے چار کروڑ روپے کی کامیاب بولی لگائی جبکہ اسی ٹیم نے تجربہ کار افغان بولر محمد نبی کو 30 لاکھ روپے کے عوض خریدا

افغانستان کے 18 سالہ لیگ سپنر راشد خان ارمان کے لیے سن رائزرز حیدرآباد نے کی بولی سب سے زیادہ رہی جس نے چار کروڑ روپے کی کامیاب بولی لگائی جبکہ اسی ٹیم نے تجربہ کار افغان بولر محمد نبی کو 30 لاکھ روپے کے عوض خریدا۔

انگلینڈ کے اوئن مورگن کی خدمات کنگز الیون پنجاب نے دو کروڑ روپے کے عوض حاصل کیں اور نیوزی لینڈ کے اوپنر مارٹن گپٹل کے لیے اسی ٹیم کی کامیاب بولی 50 لاکھ رہی۔

سری لنکا کے آل راؤنڈر اینجلو میتھیوز کو دو کروڑ روپے کے عوض دہلی ڈیئر ڈیولز نے خرید لیا جبکہ انڈیا کے آل راؤنڈر پون نیگی کو رائل چیلنجرز بنگلور نے خریدا تاہم انڈیا کے کھلاڑی عرفان پٹھان کو کوئی خریدار نہیں مل سکا۔

انگلینڈ کے جیسن روئے کو گجرات کی ٹیم نے ایک کروڑ جبکہ کرس جارڈن کو سن رائزرز نے 50 لاکھ میں خریدا۔

کوری اینڈرسن کی خدمات ڈیڑھ لاکھ امریکی ڈالر میں دہلی کی ٹیم نے حاصل کی ہے جبکہ شان ایبٹ کو خریدار نہ مل سکا۔

تصویر کے کاپی رائٹ Reuters
Image caption بین سٹوکس کے بعد ملز کو سب سے زیادہ قیمت ملی ہے

رواں سال آئی پی ایل کا پہلا مقابلہ دفاعی چیمپیئن سن را‏ئزرز حیدرآباد اور 2016 کی رنرز اپ رائل چیلنجرز بنگلور کی ٹیم کے درمیان کھیلا جائے گا۔

اس سے قبل سنیچر کو ایک بڑا قدم اٹھاتے ہوئے آئی پی ایل کے سب سے کامیاب کپتان مہندر سنگھ دھونی کو رائزنگ پونے سپرجائنٹس نے کپتانی سے ہٹا دیا۔

اب ان کی جگہ آسٹریلیا کے سٹیو سمتھ ٹیم کے کپتان مقرر کیے گئے ہیں جب کہ دھونی ایک کھلاڑی کے طور پر ٹیم میں شامل رہیں گے۔

متعلقہ عنوانات

اسی بارے میں