ورلڈ الیون کے خلاف جیت نے اعتماد میں اضافہ کیا ہے: سرفراز احمد

  • عبدالرشید شکور
  • بی بی سی اردو ڈاٹ کام، لاہور
سرفراز

،تصویر کا ذریعہAFP

پاکستانی کرکٹ ٹیم کے کپتان سرفراز احمد کا کہنا ہے کہ ورلڈ الیون آسان ٹیم نہیں تھی اس میں دنیا کے چند بڑے کھلاڑی شامل تھے اور اس کے خلاف سیریز جیتنے سے پاکستانی ٹیم کے اعتماد میں اضافہ ہوا ہے۔

لاہور کے قذافی سٹیڈیم میں کھیلے گئے تیسرے ٹی 20 انٹرنیشنل میں 33 رنز کی جیت کے بعد سرفراز احمد کا کہنا ہے کہ چیمپئنز ٹرافی اور اب ورلڈ الیون کے خلاف جیت کے بعد پاکستانی ٹیم سری لنکا کے خلاف زیادہ اعتماد سے سیریز کھیلے گی۔

سری لنکا کے خلاف دو ٹیسٹ پانچ ون ڈے اور تین ٹی 20 انٹرنیشنل میچوں کی سیریز 28 ستمبر سے متحدہ عرب امارات میں شروع ہورہی ہے جس کا آخری ٹی20 انٹرنیشنل 29 اکتوبر کو لاہور میں کھیلا جائے گا۔

سرفراز احمد نے کہا کہ تقریباً چار ماہ بعد پاکستانی ٹیم ٹیسٹ سیریز کھیلے گی جس کی تیاری کے لیے لاہور میں کیمپ لگے گا لہذا اس سیریز کی بھرپور تیاری کی جائے گی اور پوری توجہ اس سیریز پر مرکوز رہے گی۔

سرفراز احمد کا کہنا ہے کہ جب بھی آپ ہوم کراؤڈ کے سامنے کھیلتے ہیں اس کا اثر بہت موثر ہوتا ہے اور پاکستانی کھلاڑی پچھلے کئی برس سے اس سے محروم تھے۔ یہی وجہ ہے کہ جب حسن علی یا کوئی بھی دوسرا بولر گیند کررہا تھا تو کراؤڈ کا جوش وخروش اس بولر کے حوصلے بڑھارہا تھا۔م اضی میں ہم یہ چیز وسیم اکرم، وقاریونس اور شعیب اختر کی بولنگ کے وقت دیکھ چکے ہیں کہ کس طرح انھیں ہوم کراؤڈ کی سپورٹ حاصل ہوا کرتی تھی۔

،تصویر کا ذریعہEPA

سرفراز احمد کا کہنا ہے کہ انھوں نے اپنے کھلاڑیوں کو سیریز سے پہلے یہی بات کہی تھی کہ جب آپ اپنے کراؤڈ کے سامنے کھیلتے ہیں تو سب آپ کو پہچانتے ہیں اور جس طرح پاکستانی کرکٹرز نے پرفارمنس دی ہے اور انہیں شائقین نے داد دی ہے اس سے یقیناً ان کا حوصلہ بڑھے گا۔

سرفراز احمد کہتے ہیں کہ انھوں نے ورلڈ الیون کے خلاف سیریز میں شائقین کا جو جوش وخروش دیکھا ہے وہ پاکستان سپر لیگ کے فائنل اور دو سال قبل لاہور میں زمبابوے کے خلاف ہونے والے میچز میں نہیں تھا۔

سرفراز احمد کا کہنا ہےکہ پاکستانی کھلاڑیوں کی فٹنس میں بہتری آنے کے نتیجے میں فیلڈنگ کا معیار بھی بلند ہوا ہے۔