ثنا میر خواتین کرکٹ ٹیم کی کپتانی کے عہدے سے فارغ، بسمہ معروف نئی کپتان

کرکٹ تصویر کے کاپی رائٹ Getty Images
Image caption ثنا میر اور بسمہ معروف پاکستان کی بہترین کھلاڑیوں میں شامل ہیں

پاکستان کرکٹ بورڈ نے ثنا میر کو پاکستان کی خواتین کرکٹ ٹیم کی قیادت سے ہٹاتے ہوئے بسمہ معروف کو نئی کپتان مقرر کیا ہے ۔

بی بی سی کے نامہ نگار عبدالرشید شکور کے مطابق عائشہ اشعر کی جگہ نئی منیجر کا تقرر بھی کیا جا رہا ہے جبکہ محمد الیاس کی سربراہی میں قائم سلیکشن کمیٹی بھی ختم کردی گئی ہے جس کے مزید ارکان عروج ممتاز اور ندیم عباسی تھے۔

ثنا میر کی 100 وکٹیں اور بسمہ کے 2000 رنز

’کرکٹ ہی میرا پہلا پیار ہے‘

100 وکٹیں، چھٹی بہترین آل راؤنّڈر

بسمہ معروف پہلے ہی پاکستان کی خواتین ٹی ٹوئنٹی ٹیم کی کپتان ہیں۔

خواتین ٹیم میں یہ تبدیلیاں ورلڈ کپ میں پاکستانی ٹیم کی مایوس کن کارکردگی کے بعد ناگزیر تھیں۔خاص کر ہیڈ کوچ کی رپورٹ کے بعد اس بات کے امکانات روشن ہو گئے تھے کہ ثنا میر کے لیے کپتان کے طور پر برقرار رہنا ممکن نہیں رہے گا۔

انگلینڈ میں منعقدہ حالیہ خواتین ورلڈ کپ میں پاکستانی ٹیم ایک بھی میچ جیتنے میں کامیاب نہیں ہوسکی تھی جس کے بعد ہیڈ کوچ صبیح اظہر نے اپنی رپورٹ میں کہا تھا کہ ثنا میر اور چند سینیئر کھلاڑی مبینہ طور پر اپنی من مانیاں کرتی رہی تھیں اور انہیں منیجر عائشہ اشعر کی حمایت حاصل تھی۔

پاکستان کرکٹ بورڈ نے گزشتہ دنوں نیوزی لینڈ کے مارک کولز کو عبوری طور پر خواتین ٹیم کا کوچ مقرر کیا ہے۔

تصویر کے کاپی رائٹ Getty Images

پاکستان کرکٹ بورڈ نے عائشہ اشعر کو عبوری طور پر ویمنز ونگ کی سربراہ مقرر کیا ہے وہ جنرل منیجر ویمنز کرکٹ کی تقرری تک اس عہدے پر کام کریں گی۔

پاکستان کرکٹ بورڈ کا کہنا ہے کہ ثنا میر عام کھلاڑی کی حیثیت سے دستیاب ہونگی تاہم ثنا میر نے قومی کیمپ میں شامل ہونے سے انکار کر رکھا ہے۔

ثنا میر آٹھ سال تک پاکستانی ٹیم کی کپتان رہیں۔ ان کی کپتانی میں پاکستان نے 72 ون ڈے انٹرنیشنل کھیلے جن میں 26 جیتے45 ہارے اور ایک میچ نامکمل رہا۔

وہ 65 ٹی ٹوئنٹی میچوں میں کپتان رہیں جن میں سے 26 میچ جیتے اور 36 میں پاکستانی ٹیم کو شکست کا سامنا کرنا پڑا جبکہ دو میچ ٹائی ہوئے جبکہ ایک کا نتیجہ برآمد نہ ہو سکا۔

متعلقہ عنوانات

اسی بارے میں