کلین سوئیپ نہ ہوا تو بحیثیت کوچ مایوسی ہوگی: مکی آرتھر

مکی آرتھر تصویر کے کاپی رائٹ AFP

پاکستانی کرکٹ ٹیم کے ہیڈ کوچ مکی آرتھر کو پوری امید ہے کہ پاکستانی ٹیم جس عمدہ کھیل کا مظاہرہ کر رہی ہے وہ سری لنکا کے خلاف ایک روزہ سیریز پانچ صفر سے جیت جائے گی۔

پاکستان اور سری لنکا کے درمیان پانچواں اور آخری ون ڈے انٹرنیشنل پیر کو شارجہ میں کھیلا جائے گا۔

مکی آرتھر نے اتوار کو شارجہ کرکٹ سٹیڈیم میں پاکستانی ٹیم کی پریکٹس کے موقع پر بی بی سی سے بات کرتے ہوئے کہا کہ کھلاڑیوں میں جیت کی بھوک موجود ہے اور وہ چاہتے ہیں کہ کلین سوئپ ہو۔ انھوں نے مزید کہا کہ اگر ایسا نہ ہوا تو بحیثیت کوچ انہیں مایوسی ہوگی۔

یہ بھی پڑھیے

سٹے بازوں کے رابطے کی تصدیق، کھلاڑی کا نام ظاہر نہیں کیا

’کبڈی کھیلتا تھا، بھائی نے کرکٹ کی طرف رکھا‘

کلین سوئیپ کی کوشش کریں گے: سرفراز احمد


مکی آرتھر کا کہنا ہے کہ پاکستانی ٹیم کے لیے ضروری ہے کہ اب تک وہ جس طرح کا کھیل پیش کرتی آئی ہے اسے برقرار رکھے۔

واضح رہے کہ چیمپئنز ٹرافی کے پہلے میچ میں بھارت سے ہارنے کے بعد پاکستانی ٹیم اب تک لگاتار آٹھ ون ڈے انٹرنیشنل جیت چکی ہے۔

مکی آرتھر نے کہا کہ سب سے اہم بات یہ ہوتی ہے کہ کھلاڑی اپنی ذمہ داری اور اپنے رول کو کتنا سمجھتے ہیں۔

'بحیثیت کوچ میں اپنے کھلاڑیوں سے یہی تقاضا کرتا ہوں کہ وہ جارحانہ کرکٹ کھیلیں‘۔

مکی آرتھر نے ٹیم کے ایک کھلاڑی کو فکسنگ کی مبینہ پیشکش کے بارے میں کہا کہ اس کھلاڑی نے بہت ہی اچھا کام کیا اور بروقت اس کی رپورٹ کر کے اس معاملے کو بالکل صحیح انداز میں ہینڈل کیا۔

'درحقیقت اس کھلاڑی نے قواعد وضوابط کی پاسداری کر کے ٹیم اور پوری کرکٹ کے لیے ایک بہترین مثال قائم کی ہے‘۔

یہ بھی پڑھیے

وہ جنید خان کہاں رہ گئے؟

’تو یونس خان سے پوچھنے میں کیا حرج ہے؟‘

یاسر شاہ کو سانس لینے دیں


مکی آرتھر کا کہنا ہے کہ وہ اپنی ٹیم کے ایک ایک کھلاڑی سے مطمئن ہیں۔ انھوں نے کہا کہ یہ تمام کے تمام ذہین نوجوان کرکٹرز ہیں اور انہیں اس بارے میں کوئی شک و شبہ نہیں کہ اگر ان میں سے کسی سے بھی مشکوک فرد رابطہ کرے تو وہ ویسا ہی کریں گے جیسا کہ اس کھلاڑی نے اس سیریز کے دوران کیا ہے۔

مکی آرتھر کا کہنا ہے کہ حسن علی کا عالمی رینکنگ میں پہلے نمبر پر آنا، بابراعظم کا نمبر چار پوزیشن پر ہونا اور محمد حفیظ کا دوبارہ عالمی نمبر ایک آل راؤنڈر بننا یہ ظاہر کرتا ہے کہ پاکستانی ٹیم ون ڈے کی ایک بہت ہی اچھی ٹیم بنتی جارہی ہے۔

متعلقہ عنوانات

اسی بارے میں