پاکستان کا نو سال بعد ون ڈے سیریز میں کلین سویپ

کرکٹ تصویر کے کاپی رائٹ AFP
Image caption فخر زمان اور امام الحق نے پہلی وکٹ کی شراکت میں 84 رنز بنائے

شارجہ میں کھیلے جانے والے سیریز کے پانچویں اور آخری ایک روزہ کرکٹ میچ میں پاکستان نے سری لنکا کو شکست دے کر سریز پانچ صفر سے جیت لی ہے۔

پاکستان نے 104 رنز کا ہدف 21ویں اوور میں ایک وکٹ کے نقصان پر باآسانی حاصل کر لیا۔

اوپنر فخر زمان اور امام الحق نے پر اعتماد انداز میں کھیلتے ہوئے پہلی وکٹ کی شراکت میں 84 رنز بنا کر اپنی ٹیم کی جیت میں اہم کردار ادا کیا۔

اس سے قبل پاکستان نے کسی بھی پانچ ایک روزہ میچوں کی سیریز میں آخری مرتبہ سنہ 2008 میں کلین سویپ کیا تھا، جبکہ سری لنکا ایک ہی سال میں پانچ ایک روزہ میچوں کی تین سیریز میں کلین سویپ ہونے والی پہلی ٹیم بن گئی ہے۔

میچ کا تفصیلی سکور کارڈ

پاکستان کے آؤٹ ہونے والے واحد بلے باز فخر زمان تھے جنھوں نے 48 رنز کی اننگز کھیلی جبکہ امام الحق 45 رنز بنا کر ناٹ آؤٹ رہے۔

سری لنکا نے ٹاس جیت کر پہلے بلے بازی کا فیصلہ کیا تو عثمان شنواری کی عمدہ بولنگ کی بدولت مہمان ٹیم 27ویں اوور میں 103 رنز پر ڈھیر ہو گئی۔

اپنا دوسرا ہی ون ڈے کرکٹ میچ کھیلنے والے عثمان شنواری نے اس میچ میں اپنی پہلی پانچ وکٹیں حاصل کی ہیں۔

تصویر کے کاپی رائٹ AFP
Image caption عثمان شنواری نے شاندار بولنگ کرتے ہوئے پانچ وکٹیں حاصل کیں

عثمان شنواری کے علاوہ حسن علی اور شاداب خان نے دو، دو کھلاڑیوں کو آؤٹ کیا جبکہ ایک بلے باز رن آؤٹ ہوا۔

سری لنکا کی جانب سے تھسرا پریرا نے 25 اور تھرمانے نے 19 رنز کی اننگز کھیلی۔

پاکستان نے اس میچ میں جنید خان کی جگہ فہیم اشرف کو ٹیم میں شامل کیا ہے جبکہ سری لنکا نے ٹیم میں تین تبدیلیاں کی ہیں۔

پاکستان کو پانچ ایک روزہ میچوں کی سیریز میں چار صفر سے برتری حاصل ہے اور سری لنکا کو رواں برس تیسری مرتبہ کسی سیریز میں کلین سوئیپ کی خفت کا سامنا ےہ۔

اس سال اس سے قبل جنوبی افریقہ اور انڈیا کی ٹیمیں بھی سری لنکا کو پانچ صفر سے سیریز ہرا چکی ہیں۔

یہ بھی پڑھیے

کلین سوئیپ نہ ہوا تو مایوسی ہوگی: مکی آرتھر

پاکستان نے سری لنکا کو چوتھے ون ڈے میں شکست دے دی

کلین سوئیپ کی کوشش کریں گے: سرفراز احمد

پاکستانی کرکٹ ٹیم کے ہیڈ کوچ مکی آرتھر کو پوری امید ہے کہ پاکستانی ٹیم جس عمدہ کھیل کا مظاہرہ کر رہی ہے وہ سری لنکا کے خلاف ایک روزہ سیریز پانچ صفر سے جیت جائے گی۔

پاکستان نے سری لنکا کو پہلے ایک روزہ میچ میں 83 رنز سے شکست دی، دوسرے میچ میں 32 رنز سے، تیسرے ایک روزہ میچ میں سات وکٹوں سے سے اور چوتھے میچ میں بھی سات وکٹوں سے شکست دی۔

تصویر کے کاپی رائٹ Getty Images

مکی آرتھر کا کہنا ہے کہ کھلاڑیوں میں جیت کی بھوک موجود ہے اور وہ چاہتے ہیں کہ کلین سوئیپ ہو۔ انھوں نے مزید کہا کہ اگر ایسا نہ ہوا تو بحیثیت کوچ انہیں مایوسی ہوگی۔

مکی آرتھر کا کہنا ہے کہ پاکستانی ٹیم کے لیے ضروری ہے کہ اب تک وہ جس طرح کا کھیل پیش کرتی آئی ہے اسے برقرار رکھے۔

واضح رہے کہ چیمپئنز ٹرافی کے پہلے میچ میں بھارت سے ہارنے کے بعد پاکستانی ٹیم اب تک لگاتار آٹھ ون ڈے انٹرنیشنل جیت چکی ہے۔

تصویر کے کاپی رائٹ AFP

سری لنکا کے خلاف ایک روزہ سیریز میں حسن علی عالمی رینکنگ میں پہلے نمبر پر آئے ہیں، بابراعظم نمبر چار پوزیشن پر اور محمد حفیظ دوبارہ عالمی نمبر ایک آل راؤنڈر بن گئے ہیں۔

متعلقہ عنوانات

اسی بارے میں