ٹی 10 لیگ: سینچری بناؤ، دبئی میں گھر پاؤ

تصویر کے کاپی رائٹ T10LEAGUE/FACEBOOK
Image caption شارجہ میں کھیلی جانے والی ٹی ٹین لیگ میں چھ ٹیمیں حصہ لے رہی ہیں

دنیا بھر میں ٹی ٹوئنٹی کرکٹ لیگز کی کامیابی کے بعد اب متحدہ عرب امارات میں ٹی ٹین لیگ کا آغاز ہونے جار رہا ہے جس میں امید ہے کہ شائقین کو بلے بازوں کی جانب سے خاصی جارحانہ بیٹنگ دیکھنے کو ملے گی۔

ٹی ٹین لیگ کا آغاز جمعرات سے شارجہ کرکٹ سٹیڈیم میں ہو رہا ہے جس میں چھ ٹیمیں پنجابی لیجنڈز، بنگال ٹائیگرز، کیرالہ کنگز، مراٹھا عربیئنز، پختونز اور ٹیم سری لنکا حصہ لیں گی۔

یہ بھی پڑھیے

بنگلہ دیش پریمیئر لیگ فائنل میں کرس گیل کے 18 چھکے

نوجوانوں کی گلی محلے کی کرکٹ اب سٹیڈیم میں

اس کرکٹ لیگ میں جہاں بلے بازوں کی کوشش زیادہ سے زیادہ چھکے چوکے لگانے کی ہو گی وہیں ہارڈ ہٹنگ بلے بازوں کی کوشش دبئی میں وہ اپارٹمنٹ بھی جیتنے کی ہوگی جو کہ ٹی ٹین لیگ میں سینچری سکور کرنے والے بلے باز کو ملے گا۔

خلیج ٹائمز کے ساتھ بات کرتے ہوئے ایکوا پراپرٹیز کے علی تمبی نے جو کہ مراٹھا عریبئنز ٹیم کے مالک بھی ہیں، کہا ہے کہ ’جو بلے باز بھی اس لیگ میں سینچری سکور کرے گا اسے دبئی میں پانچ لاکھ درہم مالیت کا ایک سٹوڈیو اپارٹمنٹ بطور انعام دیا جائے گا۔‘

ان سے سوال کیا گیا کہ کیا یہ کسی بھی بلے باز کے لیے ممکن ہوگا کہ وہ 60 گیندوں پر مبنی اننگز میں 30 یا 40 گیندیں کھیل کر سینچری سکور کرے؟ اس پر ان کا جواب تھا کہ ’کیوں نہیں‘۔

تصویر کے کاپی رائٹ Getty Images
Image caption بنگلہ دیش پریمیئر لیگ کے فائنل میں ویسٹ انڈیز کے کرس گیل نے 18 چھکے لگا کر صرف 69 گیندوں پر 146 رنز کی اننگز کھیلی

علی تمبی نے کہا کہ ’دوسری ٹیموں کے بلے باز بھی ایسا کر سکتے ہیں لیکن اگر میں اپنی ٹیم کی بات کروں تو ایلکس ہیلز، وریندر سہواگ اور کامران اکمل ایسا کرنے کی صلاحیت رکھتے ہیں۔‘

ان کا کہنا تھا کہ کامران اکمل اس سے قبل بھی 70 گیندوں پر 150 رنز سکور کر چکے ہیں جس کا مطلب ہے کہ 40 گیندوں پر سینچری بھی ہو سکتی ہے۔ ہمیں امید ہے کہ کوئی نہ کوئی سینچری سکور کر کے اپارٹمنٹ جیتے گا۔‘

یہ کہنا کہ ایسا کرنا کسی بلے باز کے لیے مشکل ہوگا اس لیے بھی درست نہیں کیونکہ ابھی حال ہی میں ہونے والی بنگلہ دیش پریمیئر لیگ کے فائنل میں ویسٹ انڈیز کے کرس گیل نے 18 چھکے لگا کر صرف 69 گیندوں پر 146 رنز کی اننگز کھیل کر سب کو حیران کر دیا تھا۔

خیال رہے کہ پاکستان کی ٹی ٹوئنٹی لیگ یعنی پاکستان سپر لیگ میں بھی کچھ ایسا ہی اعلان کیا جاتا رہا ہے جس کا نام ’کیچ اے کروڑ‘ ہے۔

متعلقہ عنوانات

اسی بارے میں