پی ایس ایل: کوئٹہ گلیڈی ایٹرز نے پشاور زلمی کو شکست دے دی

شین واٹسن تصویر کے کاپی رائٹ PSL

پاکستان سپر لیگ کے تیسرے ایڈیشن میں سنیچر کو دبئی میں کھیلے گئے دوسرے میچ میں کوئٹہ گلیڈی ایٹرز نے پشاور زلمی کو چھ وکٹوں سے شکست دے دی۔

دونوں ٹیموں کے لیے پاکستان سپر لیگ کے آخری مرحلے تک رسائی کے لیے اہم اس میچ میں کوئٹہ گلیڈی ایٹرز نے 158 رنز کا ہدف چار وکٹوں کے نقصان پر آخری اوور میں حاصل کر لیا۔

آخری اوور میں کوئٹہ گلیڈی ایٹرز کو جیتنے کے لیے پانچ رنز درکار تھے جو اس نے ابتدائی دو گیندوں پر ہی حاصل کر لیے۔

یہ بھی پڑھیے

کوئٹہ گلیڈی ایٹرز کی 67 رنز سے جیت

اسلام آباد یونائیٹڈ کی پشاور زلمی کے خلاف 26 رنز سے جیت

پی ایس ایل کیا کیا بیچے گی؟

کوئٹہ گلیڈی ایٹرز کی جانب سے کپتان سرفراز احمد نے ابتدائی وکٹیں گرنے کے بعد ریلی رسوو کے ہمراہ اہم اننگز کھیلی اور دونوں بلے بازوں نے پانچویں وکٹ کی شراکت میں 73 رنز جوڑے۔

سرفراز احمد 31 گیندوں پر 45 جبکہ ریلی رسوو نے 27 گیندوں پر 30 رنز کی ناقابل شکست اننگز کھیلی۔

پشاور زلمی کی جانب سے ڈاسن، عمید، حسن علی اور وہاب ریاض نے ایک، ایک وکٹ حاصل کی۔

تصویر کے کاپی رائٹ PSL

اس سے قبل کوئٹہ گلیڈی ایٹرز نے ٹاس جیت کر پہلے فیلڈنگ کا فیصلہ کیا تو پشاور زلمی کی ٹیم مقررہ 20 اوورز میں پانچ وکٹوں کے نقصان پر 157 رنز بنا سکی۔

پشاور زلمی کی جانب سے محمد حفیظ 31، رکی ویسلز 31، ڈوائن سمتھ 49 اور کپتان ڈیرن سیمی نے 36 رنز کی اننگز کھیلی۔

کوئٹہ گلیڈی ایٹرز کی اس جیت کے ساتھ ہی لاہور قلندرز کی اگلے مرحلے میں پہنچنے کی امیدیں بھی دم توڑ گئیں ہیں۔

تاہم پشاور زلمی کو پاکستان سپر لیگ کے اگلے مرحلے تک رسائی حاصل کرنے کے لیے اپنے اگلے دونوں میچوں میں کامیابی حاصل کرنا ہوگی۔

اس وقت پوائنٹس ٹیبل پر کوئٹہ گلیڈی ایٹرز پہلے، اسلام آباد یونائیٹڈ دوسرے، کراچی کنگز تیسرے، ملتان سلطانز چوتھے اور پشاور زلمی پانچویں نمبر پر موجود ہیں جبکہ لاہور قلندرز کا آخری نمبر ہے۔

متعلقہ عنوانات

اسی بارے میں