پی ایس ایل 3: لاہور قلندرز نے سپر اوور میں کراچی کنگز کو شکست دے دی

پاکستان سپر لیگ تصویر کے کاپی رائٹ PSL

پاکستان سپر لیگ کے تیسرے ایڈیشن میں سنیچر کو دبئی میں کھیلے گئے میچ میں لاہور قلندرز نے ایک دلچسپ مقابلے کے بعد کراچی کنگز کو سپر اوور میں ہرا دیا ہے۔

لاہور قلندرز نے سپر اوور میں کراچی کنگز کو فتح کے لیے 12 رنز کا ہدف دیا جس کے جواب میں سنیل نرائن کی شاندار بولنگ کی بدولت کراچی کنگز کی ٹیم صرف آٹھ رنز ہی بنا سکی۔

اس سے قبل کراچی کنگز نے پہلے بلے بازی کرتے ہوئے لاہور قلندرز کو جیتنے کے لیے 164 رنز کا ہدف دیا تھا جس کے تعاقب میں لاہور کی ٹیم نے مقررہ اوورز میں 163 رنز بنائے اور میچ ٹائی ہو گیا۔

لاہور قلندرز کی جانب سے آغا سلمان 50 رنز کے ساتھ نمایاں بلے باز رہے۔

مزید پڑھیے

’ہر کوئی کپتان پر اعتماد کرتا ہے‘

’یہ ستارے آسمان پہ نہیں ملتے بھئی‘

مونچھیں ہوں تو وہاب ریاض جیسی

تصویر کے کاپی رائٹ PSL

لاہور قلندرز کو اننگز کے آخری اوور میں جیتنے کے لیے 14 رنز درکار تھے لیکن وہ صرف 13 رنز ہی بنا سکی۔ اس طرح میچ کا فیصلہ سپر اوور کے ذریعے ہوا۔

عثمان شنواری کی جانب سے کرایا جانے والا لاہور قلندرز کی اننگز کا آخری اوور انتہائی ڈرامائی تھا، کیونکہ اس اوور کی آخری گیند پر جب لاہور قلندرز کو جیتنے کے لیے تین رنز درکار تھے تو سہیل اختر کیچ آؤٹ ہو گئے لیکن وہ گیند نو بال نکلی۔

اگلی گیند پر لاہور کو فتح کے لیے دو رن درکار تھے مگر بلے باز دوسرے رن کی کوشش کے دوران رن آؤٹ ہو گئے اور یوں میچ ٹائی ہو گیا۔

تصویر کے کاپی رائٹ PSL

آج لاہور قلندرز نے جب ٹاس جیت کر کراچی کو پہلے بیٹنگ کی دعوت دی تو کراچی کنگز کا آغاز اتنا اچھا نہ تھا اور 19 کے مجموعی سکور پر ان کے ان فارم بلے باز جو ڈینلی یاسر شاہ کی پہلی گیند پر ہی آوٹ ہوگئے۔

تاہم پہلی وکٹ گرنے کے بعد کراچی کنگز کے بلے بازوں میں شاندار کھیل کا مظاہرہ کیا اور لینڈل سمنز کے ساتھ بابر اعظم نے 72 رنز کی شراکت کی۔ لینڈل سمنز 55 رنز جبکہ بابر اعظم 61 رنز بنا کر آؤٹ ہوئے۔

یاد رہے کہ لاہور قلندرز کی پی ایس ایل 3 میں کارکردگی انتہائی بری رہی ہے اور ٹیم نے اس میچ سے قبل سات میں سے صرف ایک میں کامیابی حاصل کی ہے۔

لاہور قلندرز کے لیے اس ٹورنامنٹ میں اب پلے آفز تک پہنچنا ناممکن ہے۔

اسی بارے میں