پاکستان سپر لیگ 3: ’کراچی کنگز کے کپتان عماد وسیم ٹھیک ہیں‘

عماد وسیم تصویر کے کاپی رائٹ PSL

پاکستان سپر لیگ کی ٹیم کراچی کنگز کے کپتان عماد وسیم اتوار کے روز لاہور قلندرز کے خلاف میچ میں زخمی ہونے کے بعد ٹھیک حالت میں ہیں تاہم انھوں نے گذشتہ شب ہسپتال میں ڈاکٹروں کے زیرِ نگرانی گزاری ہے۔

پیر کو پاکستان سپر لیگ کے ٹوئٹر اکاؤنٹ پر عماد وسیم کی حالت کے بارے میں مختصر پیغام جاری کیا گیا ہے۔

یاد رہے کہ اتوار کی شام لاہور قلندرز کے خلاف ایک کیچ لیتے ہوئے عماد وسیم کے سر پر شدید چوٹ آئی تھی جس کے بعد انھیں سٹریچر پر گراؤنڈ نے باہر لایا گیا تھا۔

کراچی کنگز کی ٹیم کے مالک سلمان اقبال نے گذشتہ شب عماد وسیم کی صحت کے حوالے سے ایک ٹویٹ کی تھی جس میں ان کا کہنا تھا کہ ’عماد وسیم کی حالت ٹھیک ہے اور ان کی تمام نیک تمنائیں کپتان کے ساتھ ہیں۔‘

پاکستان سپر لیگ کے تیسرے ایڈیشن میں اتوار کو دبئی میں کھیلے گئے میچ میں لاہور قلندرز نے ایک دلچسپ مقابلے کے بعد کراچی کنگز کو سپر اوور میں ہرا دیا ہے۔

اسی دوران محمد عامر کی گیند پر عماد وسیم نے لانگ آف کی پوزیشن پر الٹے قدم بھاگتے ہوئے سہیل خان کا ایک کیچ پکڑا تاہم ان کا سر شدید زور سے زمین پر جا لگا۔

اب تک اس ٹورنامنٹ میں اسلام آباد کے بولر رومان رئیس بھی گھٹنے میں چوٹ کی وجہ سے شدید زخمی ہو چکے ہیں۔ اس کے علاوہ کراچی کے شاہد آفریدی اور پشاور کے ڈیرن سمی بھی چوٹیں لگنے کے باعث چند میچوں سے باہر ہوگئے تھے۔

گذشتہ شب لاہور قلندرز نے سپر اوور میں کراچی کنگز کو فتح کے لیے 12 رنز کا ہدف دیا جس کے جواب میں سنیل نرائن کی شاندار بولنگ کی بدولت کراچی کنگز کی ٹیم صرف آٹھ رنز ہی بنا سکی۔

اس سے قبل کراچی کنگز نے پہلے بلے بازی کرتے ہوئے لاہور قلندرز کو جیتنے کے لیے 164 رنز کا ہدف دیا تھا جس کے تعاقب میں لاہور کی ٹیم نے مقررہ اوورز میں 163 رنز بنائے اور میچ ٹائی ہو گیا۔

متعلقہ عنوانات

اسی بارے میں