ویڈیو پرانی ہے، کرپشن سے تعلق نہیں: حسن رضا

حسن رضا تصویر کے کاپی رائٹ Getty Images
Image caption حسن رضا پاکستان کرکٹ بورڈ کے سینٹرل کنٹریکٹ کھلاڑی نہیں ہیں

پاکستان کے سابق ٹیسٹ کرکٹر حسن رضا نے کرپشن میں مبینہ طور پر ملوث ہونے کی تردید کرتے ہوئے کہا ہے کہ اس سلسلے میں بلاوجہ ان کا نام لیا جا رہا ہے۔

واضح رہے کہ الجزیرہ ٹی وی نے گذشتہ دنوں ایک ویڈیو جاری کی جس میں ایک سٹنگ آپریشن کے دوران سابق انڈین کرکٹر رابن مورس کو انڈر کور رپورٹر کے ساتھ کرکٹ میچ میں پیسے بنانے کے طریقے کے بارے میں گفتگو کرتے ہوئے دکھایا گیا ہے۔

اس وڈیو میں حسن رضا کو بھی دیکھا جا سکتا ہے۔

حسن رضا نے بی بی سی کو بتایا کہ یہ وڈیو پرانی ہے جس میں وہ کرکٹ ٹورنامنٹ کے بارے میں ہونے والی میٹنگ سمجھ کر شریک ہوئے تھے لیکن ان کے مطابق بعد میں جب انھوں نے دیکھا کہ یہ معاملہ گڑ بڑ ہے تو وہ اس سے الگ ہو گئے تھے۔

یہ بھی پڑھیے

مثبت ڈوپنگ ٹیسٹ: رضا حسن کی اپیل واپس

پاکستانی سپنر رضا حسن نے دو سالہ پابندی کو چیلنج کر دیا

حسن رضا کا یہ بھی کہنا ہے کہ اس ویڈیو میں دیکھا جاسکتا ہے کہ وہ پوری گفتگو میں شریک نہیں ہوئے اور تمام وقت خاموش رہے۔

سابق ٹیسٹ کرکٹر کے مطابق انھیں جب معلوم ہوا کہ عجمان میں ہونے والے ایک ٹورنامنٹ میں مبینہ طور پر گڑبڑ ہو سکتی ہے تو انھوں نے اس بارے میں آئی سی سی کو مطلع کر دیا تھا۔

دوسری جانب پاکستان کرکٹ بورڈ حسن رضا کے مبینہ طور پر ملوث ہونے پر نظر رکھے ہوئے ہے اور وہ اس سلسلے میں تمام ضروری معلومات حاصل کر رہا ہے۔

پاکستان کرکٹ بورڈ نے حسن رضا کو طلب کیے جانے کے بارے میں ابھی کوئی فیصلہ نہیں کیا ہے۔

واضح رہے کہ حسن رضا پاکستان کرکٹ بورڈ کے سینٹرل کنٹریکٹ کھلاڑی نہیں ہیں لیکن فرسٹ کلاس کرکٹر ہونے کے باعث ان پر انہی قواعد و ضوابط کا اطلاق ہوتا ہے جو دوسرے کرکٹرز پر ہے۔

حسن رضا کون ہیں؟

حسن رضا سات ٹیسٹ اور 16 ون ڈے انٹرنیشنل میچوں میں پاکستان کی نمائندگی کر چکے ہیں۔

انھیں شہ سرخیوں میں اس وقت جگہ ملی جب انھوں نے سنہ 1996 میں زمبابوے کے خلاف فیصل آباد میں 14 سال 227 دن کی عمر میں اپنے ٹیسٹ کریئر کا آغاز کر کے دنیا کے سب سے کم عمر ٹیسٹ کرکٹر بننے کا اعزاز حاصل کیا۔

انھوں نے اسی دورے میں 14 سال 233 دن کی عمر میں اپنا پہلا ون ڈے انٹرنیشنل کھیل کر دنیا کے سب سے کم عمر ون ڈے کرکٹر بننے کا اعزاز بھی حاصل کیا تاہم پاکستان کرکٹ بورڈ نے ان کی عمر کے بارے میں شک و شبہ ظاہر کیا تھا۔

حسن رضا نے فرسٹ کلاس کرکٹ میں 36 سنچریاں سکور کی ہیں تاہم انڈیا میں منعقدہ متنازع انڈین کرکٹ لیگ (آئی سی ایل) میں شرکت کے بعد ان کی بین الاقوامی کرکٹ میں واپسی کی رہی سہی امیدیں بھی ختم ہو گئی تھیں۔

انھوں نے اس انڈین کرکٹ لیگ میں ممبئی چیمپس کی نمائندگی کی تھی۔ الجزیرہ ٹی وی کی وڈیو میں نظر آنے والے رابن مورس بھی ممبئی چیمپس میں شامل تھے۔

حسن رضا کافی عرصے سے متحدہ عرب امارات میں کرکٹ کھیل رہے ہیں جس کا ایک بڑا مقصد بین الاقوامی کرکٹ میں یو اے ای کی نمائندگی کرنا رہا ہے۔

وہ پاکستان کی ڈومیسٹک کرکٹ میں پی ٹی وی کی ٹیم کی جانب سے کھیلنے کے علاوہ پچھلے دنوں پی ٹی وی سپورٹس پر ہونے والے پروگراموں میں بھی ماہر کے طور پر شریک رہے ہیں۔

متعلقہ عنوانات

اسی بارے میں