دبئی: ٹی ٹوئنٹی سیریز پاکستان کے نام، دوسرے میچ میں 11 رنز سے جیت

کرکٹ

،تصویر کا ذریعہAFP

متحدہ عرب امارات کے شہر دبئی میں کھیلے جا رہے پاکستان اور آسٹریلیا کے درمیان دوسرے ٹی ٹوئنٹی میچ میں پاکستان آسٹریلیا کو 11 رنز سے ہرا کر سیریز اپنے نام کر لی ہے۔

یہ پاکستان کی ٹی ٹوئنٹی میں مسلسل دسویں سیریز جیت ہے اور کپتان سرفراز احمد نے اب تک اپنی قیادت میں کسی بھی سیریز میں شکست نہیں کھائی ہے۔ انھوں نے اب تک 29 میچوں میں کپتانی کے فرائض سرانجام دیے ہیں اور 25 میں فتح حاصل کی ہے۔

اس میچ بھی آسٹریلیا کو ان کی ٹیم نے تعاقب میں شروع سے ہی دباؤ میں رکھا لیکن چھٹی وکٹ کی شراکت میں گلین میکس ویل اور نیتھن کولٹر نے برق رفتاری سے کھیلتے ہوئے شراکت کی نصف سنچری مکمل کر لی اور اپنی ٹیم کے لیے جیت کی امید روشن رکھیں۔

آخری اوور میں انھیں 23 رنز کی ضرورت تھی اور اپنا پانچواں میچ کھیلنے والے نوجوان فاسٹ بولر شاہین آفریدی کی پہلی ہی گیند پر نیتھن کولٹر نائل نے 106 میٹر طویل چھکا لگا کر اوور کا آغاز کیا لیکن بولر نے اپنے حواس قابو میں رکھے۔

دو گیندوں بعد شعیب ملک نے میکسویل کا اہم ترین کیچ لیا اور فوراً بعد کولٹر نائل بھی آؤٹ ہو گئے اور یوں پاکستان نے اپنی جیت مکمل کر لی۔

سیریز کا آخری میچ اتوار کو دبئی میں ہی کھیلا جائے گا۔

،تصویر کا ذریعہPcb

،تصویر کا کیپشن

آسٹریلیا کی جانب سے گلین میکس ویل نے شاندار بیٹنگ کی اور نصف سنچری بنائی لیکن وہ ٹیم کو فتح سے ہمکنار نہ کرا سکے

آسٹریلیا کی جانب سے گلین میکس ویل نے دو کیچز ڈراپ ہونے کا پورا فائدہ اٹھایا اور 37 گیندوں پر 52 رنز بنائے جبکہ ان کا بھرپور ساتھ دینے والے نیتھن کولٹر نائل نے 17 گیندوں پر تین چھکوں کی مدد سے 27 رنز بنائے۔

پاکستان کی جانب سے عماد وسیم نے ایک بار پھر انتہائی نپی تلی بولنگ کی اور چار اوورز میں ایک وکٹ صرف آٹھ رنز دے کر حاصل کی اور اس کارکردگی پر انھیں مسلسل دوسرے میچ میں بہترین کھلاڑی کا اعزاز مل۔

ان کے علاوہ شاداب خان اور شاہین آفریدی نے دو، دو وکٹیں حاصل کیں۔

اس سے قبل جب اننگز شروع ہوئی تو پہلے میچ کی طرح آسٹریلیا کا آغاز ایک بار پھر اچھا نہ تھا اور پہلے پانچ اوورز میں ہی آسٹریلیا نے 19 رنز کے عوض دو وکٹیں گنوا دیں۔

اوپنر ڈارسی شارٹ عماد وسیم کی گیند پر رن آؤٹ ہو گئے جب بولرز اینڈ پر گیند عماد وسیم کے ہاتھوں سے لگتے ہوئے وکٹوں میں جا لگی اور ڈارسی شارٹ کے بلا ہوا میں تھا۔ انھوں نے دو رنز بنائے۔

اس کے بعد کرس لِن سات رنز بنا کر عماد وسیم کی ہی گیند پر آؤٹ ہوئے جن کا کیچ شاداب خان نے لیا۔

،تصویر کا ذریعہPcb

پاور پلے کے بعد شاداب خان نے کپتان آرون فنچ کو بھی ٹھکانے لگا دیا جو فخر زمان کے ہاتھوں تین رنز بنا کر کیچ آؤٹ ہوئے۔

مچل مارش اور گلین میکس ویل کے درمیان پانچ اوورز میں 30 رنز کی شراکت داری پاکستان کے لیے مشکل کا باعث بن سکتی تھی لیکن 12ویں اوور میں شاداب خان نے اپنی دوسری وکٹ حاصل کر لی جب مچل مارش کا کیچ کپتان سرفراز احمد نے پکڑ لیا۔ انھوں نے 21 رنز بنائے۔

اس کے فوراً بعد محمد حفیظ نے اپنا پہلا اوور پھینکا اور ایلکس کیری کو ایک رن پر آؤٹ کر دیا۔

14ویں اوور میں شاہین آفریدی واپس آئے اور ان کی سلو گیند پر گلین میکس ویل نے اونچا شاٹ کھیلا لیکن عماد وسیم کیچ نہ پکڑ سکے۔ لیکن دو گیندوں بعد نئے آنے والی بین میکڈرمٹ کو فخر زمان نے زبردست فیلڈنگ کرتے ہوئے رن آؤٹ کرا دیا۔

،تصویر کا ذریعہAFP

اس سے قبل پاکستان کی جانب سے اوپنر فخر زمان اور بابر اعظم نے اننگز کا آغاز کیا۔ سب سے پہلے فخر زمان کولٹر نائل کی گیند پر 11 رنز بنا کر آؤٹ ہوگئے۔

آؤٹ ہونے والے دوسرے کھلاڑی محمد حفیظ تھے۔ انھوں نے 40 رنز بنائے اور سٹین لیک کی گیند پر کیچ آؤٹ ہوگئے۔

گذشتہ میچ کے کامیاب ترین پاکستانی بلے باز بابر اعظم اس بار اپنی نصف سنچری مکمل نہ کر سکے۔ وہ 45 کے سکور پر آؤٹ ہوئے۔

اس کے بعد آصف علی نے آ کر جارحانہ انداز میں کھیلنے کی کوشش کی تاہم وہ زیادہ دیر وکٹ پر نہ رک سکے۔ انھوں نے چھ گیندوں پر 9 رنز بنائے۔

شعیب ملک بھی اس بار بڑا سکور نہیں کر سکے اور 14 کے سکور پر آؤٹ ہوگئے جس کے بعد حسن علی کوئی بھی سکور کیے بغیر پویلین لوٹ گئے۔

ان کے بعد عماد وسیم اور فہیم اشرف نے پاکستانی سکور کو 147 تک پہنچا دیا۔

،تصویر کا ذریعہAFP

یاد رہے کہ تین ٹوئنٹی میچوں کی سیریز میں پاکستان کو ایک صفر کی برتری حاصل ہے۔ بدھ کے روز پہلے میچ میں جارحانہ پاکستانی بولنگ کی تاب نہ لاتے ہوئے آسٹریلوی بیٹنگ 88 رنز بنا کر ریت کی دیوار ثابت ہوئی اور 66 رنز سے میچ ہار گئی۔

پہلے میچ کے مقابلے میں دونوں ٹیموں میں ایک ایک تبدیلی کی گئی ہے۔ پاکستان کی جانب سے حسین طلعت کی جگہ شعیب ملک آئے ہیں اور آسٹریلیا کے لیے ایشٹن آگر کی جگہ مچ مارش نے لی ہے۔

پاکستان کی ٹیم ان کھلاڑیوں پر مشتمل ہے: فخرزمان، بابر اعظم، محمد حفیظ، شیعب ملک، آصف علی، سرفراز احمد (کپتان)، عماد وسیم، فہیم اشرف، شاداب خان، حسن علی، اور شاہین آفریدی۔

آسٹریلیا کی ٹیم: ایرن فنچ، ڈارسی شارٹ، کرس لن، گلین میکسویل، بین میکڈرمٹ، مچل مارش، ایلکس کیری، نیتھن کورٹیئر نائل، ایڈم زمپا، اینڈریو ٹائی اور سٹین لنکا۔