نیوزی لینڈ کو چھ وکٹوں سے شکست، ٹی 20 سیریز پاکستان کے نام

بابر اعظم تصویر کے کاپی رائٹ AFP
Image caption بابر اعظم نے ایک بار پھر عمدہ بلے بازی کا مظاہرہ کیا

دبئی میں دوسرے ٹی 20 کرکٹ میچ میں پاکستان نے نیوزی لینڈ کو چھ وکٹوں سے شکست دے کر تین ٹی 20 میچوں کی سیریز اپنے نام کر لی ہے۔

یہ پاکستان کی ٹی 20 سیریز میں مسلسل 11ویں فتح ہے۔

پاکستان کو فتح کے لیے آخری اوور میں سات رنز درکار تھے جو اس نے اوور کی چوتھی گیند پر حاصل کر لیے۔

محمد حفیظ 34 رنز کے ساتھ ناٹ آؤٹ رہے جبکہ شعیب ملک میچ کے آخری اوور میں دس رنز بنا کر آؤٹ ہوئے۔

میچ کا تفصیلی سکور کارڈ

154 رنز کے ہدف کے تعاقب میں پاکستان کی پہلی وکٹ 40 کے سکور پر گری جب ملنے کی گیند پر ولیمسن نے فخر زمان کا ایک انتہائی عمدہ کیچ لیا۔ فخر زمان نے 24 رنز بنائے۔

جب بابر اعظم 40 رنز بنا کر ساؤدی کی گیند پر آؤٹ ہوئے تو اس وقت پاکستان کا مجموعی سکور 96 تھا۔

آصف علی 38 رنز بنا کر کولن منرو کی فل ٹاس گیند پر ایل بی ڈبلیو ہوگئے۔

تصویر کے کاپی رائٹ AFP

اس سے قبل نیوزی لینڈ ‌نے ٹاس جیت کر پہلے بیٹنگ کرتے ہوئے مقررہ 20 اوورز میں سات وکٹوں کے نقصان 153 رنز بنائے۔

نیوزی لینڈ کی جانب سے کورے اینڈر سن 25 گیندوں پر 44 رنز بنا کر ناقابل شکست رہے۔ پاکستان بولرز میں شاہین شاہ آفریدی نے تین جبکہ عماد وسیم اور محمد حفیظ نے ایک، ایک وکٹ حاصل کی۔

نیوزی لینڈ نے اننگز کا جارحانہ آغاز کیا تو پاکستان کو پہلی کامیابی 50 کے مجموعی سکور پر ملی جب شاہین شاہ آفریدی نے گلین فلپیس کو وکٹوں کے پیچھوں سرفراز احمد کے ہاتھوں کیچ آؤٹ کروا دیا۔ انھوں نے پانچ رنز بنائے۔

پاکستان نے وکٹ حاصل کرنے کا موقع اس وقت گنوا دیا جب 36 کے مجموعی سکور پر محمد حفیظ نے فہیم اشرف کی گیند پر ڈیپ لانگ آن پر کولن منرو کا کیچ ڈراپ کر دیا۔ تاہم وہ محمد حفیظ کی ہی بال پر سٹمپ آؤٹ ہوگئے۔ انھوں نے 28 گیندوں پر 44 رنز کی عمدہ اننگز کھیلی۔

گرینڈہوم صرف چار رنز بنا کر عماد وسیم کی گیند پر شعیب ملک کے ہاتھوں کیچ آؤٹ ہوئے۔

83 کے مجموعی سکور پر روس ٹیلر تین رنز بنا کر رن آؤٹ ہوئے۔

کین ولیمسن 34 گیندوں پر 37 رنز بنا کر شاہین شاہ آفریدی کی دوسری وکٹ بنے۔

آننگز کے آخری اوور میں ٹم سٹیفرٹ 11 رنز بنا کر آؤٹ ہوئے، انھیں بھی شاہین شاہ آفریدی نے آؤٹ کیا۔ اسی اوور میں ٹم ساؤدی بغیر کوئی رن بنائے رن آؤٹ ہوئے۔

تصویر کے کاپی رائٹ AFP
Image caption شاہین شاہ نے تین وکٹیں حاصل کیں

اس میچ کے لیے پاکستان کی ٹیم میں ایک تبدیلی کی گئی۔ فخر زمان کی ٹیم میں واپسی ہوئی اور انھیں صاحبزادہ فرحان کی جگہ ٹیم میں شامل کیا گیا۔

نیوزی لینڈ نے وہی ٹیم منتخب کی جو اس نے پہلے ٹی 20 میچ کے لیے میدان میں اتاری تھی۔

پاکستان کو تین ٹی 20 میچوں کی سیریز میں ایک صفر کی برتری حاصل ہے۔

بدھ کو ابو ظہبی میں کھیلے گئے پہلے میچ میں پاکستان نے نیوزی لینڈ کو دو رنز سے شکست دے کر ٹی 20 میچوں میں مسلسل ساتویں فتح اپنے نام کی تھی۔

خیال رہے کہ پاکستان ٹی ٹوئنٹی رینکنگ میں سر فہرست ہے۔ پاکستان نے حال ہی میں آسٹریلیا کو ٹی 20 سیریز میں تین صفر سے شکست دی تھی۔

متعلقہ عنوانات

اسی بارے میں