علی ترین کی پی ایس ایل میں کامیاب بولی سوشل میڈیا پر گرماگرم بحث کا موضوع

پاکستان کرکٹ بورڈ کے چیئر مین احسان مانی اور علی ترین

،تصویر کا ذریعہPCB

،تصویر کا کیپشن

پاکستان کرکٹ بورڈ نے چھٹی ٹیم کی بولی کے لیے اس کی بنیادی قیمت 52 لاکھ ڈالر رکھی تھی تاہم علی ترین نے اس قیمت سے زیادہ کی بولی لگا کر اس کے حقوق خرید لیے

پاکستان تحریک انصاف کے سینیئر رہنما جہانگیر ترین کے بیٹے علی ترین نے پاکستان سپر لیگ (پی ایس ایل) کی چھٹی ٹیم خرید لی ہے جس کے بعد ایسا کیسے ہو سکتا ہے کہ سوشل میڈیا پر کسی قسم کا کوئی ردعمل سامنے نہ آتا۔

جمعرات کو جیسے ہی یہ خبر سامنے آئی کے پاکستان سپر لیگ کی چھٹی ٹیم جو گذشتہ سال ملتان سلطانز کے نام سے میدان میں اتری تھی علی ترین نے خرید لی ہے تو جہاں اس پر کچھ طنز و مزاح کیا گیا وہیں یہ خبر بھی سیاسی رنگ میں رنگ دی گئی۔

جہانگیر ترین نے ٹوئٹر پر اپنے بیٹے کو ٹیم کے حقوق حاصل کرنے پر مبارک باد کچھ اس انداز میں دی: ’میں علی ترین اور جنوبی پنجاب کے کرکٹ کے شائقین جو پی ایس ایل میں اپنے خطے کی نمائندے کے خواہشمند تھے کے لیے خوش ہوں۔ اس کھیل کے لیے علی میں بہت جذبہ ہے اور مجھے یقین ہے کہ وہ پاکستان کرکٹ کے لیے کچھ بھی بامعنی کرنے کے لیے سب کچھ کریں گے۔‘

مزید پڑھیے

،تصویر کا ذریعہTWITTER

بعض سوشل میڈیا صارفین نے تو بنا وقت ضائع کیے یہ سوال اٹھا دیے کہ علی ترین ٹیم تو خرید سکتے ہیں لیکن کوئی اپنے دادا کے پیسوں سے ایک فلیٹ بھی نہیں لے سکتا؟

،تصویر کا ذریعہTWITTER

پی ایس ایل میمز نے لکھا: ’اب جب کہ علی ترین نے چھٹی ٹیم کے حقوق حاصل کر لیے ہیں، جتنے بھی آزاد کھلاڑی گھوم رہے ہیں تیار ہو جائیں، جہاز آتا ہی و گا۔‘

،تصویر کا ذریعہTWITTER

ایک صارف نے پی ایس ایل کے گذشتہ سیزن کے دوران لاہور میں ہونے والے میچ سے قبل گراؤنڈ کو سکھانے کے لیے ہیلی کاپٹر کو استعمال کیے جانے کی تصویر شیئر کرتے ہوئے لکھا: ’پی ایس ایل کی چھٹی ٹیم کے سٹیڈیم پہنچنے کے مناظر۔‘

،تصویر کا ذریعہTWITTER

اس سے قبل پی ایس ایل انتظامیہ نے سماجی رابطے کی ویب سائٹ ٹوئٹر پر گذشتہ روز ایک پیغام میں بتایا تھا کہ علی ترین نے چھٹی فرینچائز کے حقوق حاصل کر لیے ہیں۔

پاکستان کرکٹ بورڈ نے چھٹی ٹیم کی بولی کے لیے اس کی بنیادی قیمت 52 لاکھ ڈالر رکھی تھی تاہم علی ترین نے اس قیمت سے زیادہ کی بولی لگا کر اس کے حقوق خرید لیے۔

پی ایس ایل اتظامیہ نے ٹوئٹر پر ایک پیغام میں بتایا کہ علی ترین نے آئندہ سات سال کے لیے چھٹی ٹیم کے حقوق حاصل کر لیے۔

خبر رساں ادارے اے پی پی کے مطابق پاکستان کرکٹ بورڈ کے ایک ترجمان کا کہنا تھا کہ پی ایس ایل کی چھٹی ٹیم کی بولی کا عمل جمعرات کو قذافی سٹیڈیم لاہور میں ہوا جس کی بنیادی قیمت 52 لاکھ ڈالر رکھی گئی تھی۔

،تصویر کا ذریعہPSL

،تصویر کا کیپشن

پاکستان سپر لیگ کے چوتھے ایڈیشن کا آغاز 14 فروری سنہ 2019 کو رنگارنگ افتتاحی تقریب کے ساتھ متحدہ عرب امارات میں ہو گا

ترجمان کے مطابق علی ترین نے پی ایس ایل کی چھٹی فرینچائز کے حقوق سات سال کے لیے 52 لاکھ ڈالر میں حاصل کر لیے۔

اس موقع پر بات کرتے ہوئے علی ترین نے میڈیا کو بتایا تھا کہ ’ہم جنوبی پنجاب میں کرکٹ کے حوالے سے کافی کام کر رہے ہیں اور ہمارا پروگرام ہے کہ ہر ضلع میں ایک گراؤنڈ اور اکیڈمی بنانے کے ساتھ ساتھ کلب کرکٹ کو سپورٹ کریں۔‘

خیال رہے کہ پی ایس ایل میں چھٹی ٹیم کا اضافہ راوں برس ہونے والے ایڈیشن میں کیا گیا تھا جسے شان پراپرٹی بروکرز نے خرید کر اس کا نام ملتان سلطانز رکھا تھا۔

،تصویر کا ذریعہPSL Twitter account

،تصویر کا کیپشن

پی سی بی نے شون پراپرٹی بروکرز کی زیر ملکیت فرنچائز ملتان سلطانز کا معاہدہ منسوخ کردیا جس کے بعد فرنچائز کے تمام مالکانہ حقوق واپس پاکستان کرکٹ بورڈ کو منتقل ہو گئے تھے

ملتان سلطانز کی ٹیم پی ایس ایل کے تیسرے ایڈیشن میں لوگوں کی نگاہوں کا مرکز رہی اور اس نے حریف ٹیموں کے خلاف یکطرفہ فتوحات حاصل کیں تاہم اپنے اختتامی میچوں میں اسے پے در پے شکستوں کا سامنا کرنا پڑا جس کے بعد وہ ایونٹ سے باہر ہو گئی تھی۔

ملتان سلطانز کی ٹیم رواں برس طے شدہ وقت کے مطابق متعدد مواقع ملنے کے باجود اپنی بینک گارنٹی جمع کروانے میں ناکام رہی جس کے بعد پی سی بی نے ان کا معاہدہ منسوخ کرنے کا فیصلہ کیا تھا۔

پی سی بی نے شان پراپرٹی بروکرز کی زیر ملکیت فرنچائز ملتان سلطانز کا معاہدہ منسوخ کردیا تھا جس کے بعد فرنچائز کے تمام مالکانہ حقوق واپس پاکستان کرکٹ بورڈ کو منتقل ہو گئے تھے۔

گذشتہ ماہ 20 نومبر کو جب اسلام آباد میں چوتھے ایڈیشن کی ڈرافٹنگ ہوئی تو اس ٹیم کو 'چھٹی ٹیم' کا نام دیا گیا تھا۔

پاکستان سپر لیگ کے چوتھے ایڈیشن کا آغاز 14 فروری سنہ 2019 کو رنگارنگ افتتاحی تقریب کے ساتھ متحدہ عرب امارات میں ہو گا۔