پی ایس ایل: ملتان سلطانز کو کوئٹہ گلیڈی ایٹرز کے ہاتھوں شکست

پی ایس ایل

،تصویر کا ذریعہPCB

شین واٹسن اور ریلی روسو کی نصف سنچریوں کی بدولت کوئٹہ گلیڈی ایٹرز نے ملتان سلطانز کو باآسانی آٹھ وکٹوں سے شکست دے دی ہے۔

شارجہ میں کھیلے گئے پاکستان سپر لیگ کے آٹھویں میچ میں پہلے بیٹنگ کرتے ہوئے ملتان سلطانز نے کوئٹہ گلیڈی ایٹرز کو جیتنے کے لیے 161 رنز کا ہدف دیا تھا۔

کوئٹہ گلیڈی ایٹرز نے یہ ہدف 19 ویں اوور میں دو وکٹوں کے نقصان پر پورا کر لیا۔

کوئٹہ گلیڈی ایٹرز کی جانب سے شاندار بلے بازی کرتے ہوئے ریلی روسو نے نصف سنچری مکمل کی۔ انھوں نے 10 چوکوں اور ایک چھکے کی مدد سے 45 گیندوں پر 67 رنز بنائے اور ناٹ آؤٹ رہے۔

،تصویر کا ذریعہPCB

شین واٹسن کی جانب سے بھی عمدہ بیٹنگ دیکھنے میں آئی۔ وہ 11 چوکوں کی مدد سے 40 گیندوں پر 61 رنز بنا کر شاہد آفریدی کی گیند پر کیچ آؤٹ ہوئے۔ جبکہ احسن علی نو رنز بنا کر محمد عرفان کا شکار ہوئے۔

ملتان سلطانز کی جانب سے شاہد آفریدی اور محمد عرفان نے ایک، ایک وکٹ لی۔

اس سے قبل کوئٹہ گلیڈی ایٹرز نے ٹاس جیت کر ملتان سلطانز کو پہلے بیٹنگ کی دعوت دی تھی۔

یہ بھی پڑھیے

ملتان سلطانز کے کپتان شعیب ملک نے شاندار بیٹنگ کرتے ہوئے 37 گیندوں پر 53 رنز بنائے۔ وہ سہیل تنویر کی گیند پر احسن علی کے ہاتھوں کیچ آؤٹ ہوئے۔ ڈین کرسچین اور انڈرے رسل نے 18، 18 رنز بنائے جبکہ شاہد آفریدی اور علی شفیق بغیر کوئی رن بنائے آؤٹ ہوئے۔ جیمز وینس نے 28 جبکہ شان مسعود نے 18 رنز بنائے۔

،تصویر کا ذریعہPCB

کوئٹہ گلیڈی ایٹرز کی جانب سے 32 رنز کے عوض دو وکٹیں لے کر محمد عرفان نمایاں باؤلر رہے جبکہ غلام مدثر نے بھی دو کھلاڑیوں کو آؤٹ کیا۔ سہیل تنویر، محمد نواز اور فواد احمد نے ایک، ایک وکٹ حاصل کی۔

سرفراز احمد کی کپتانی میں کوئٹہ گلیڈی ایٹرز کی ٹیم شین واٹسن، احسن علی، ریلی روسو، عمر اکمل، ڈوائن سمتھ، محمد نواز، غلام مدثر، سہیل تنویر، محمد عرفان (جونئیر)، اور فواد احمد پر مشتمل تھی۔

ملتان سلطنز کی ٹیم شعیب ملک (کپتان)، شان مسعود، جیمز وینس، لوری ایوانز، ڈین کرسچین، اینڈرے رسل، شاہد آفریدی، شکیل انصر، نعمان علی، علی شفیق اور محمد عرفان پر مشتمل تھی۔

،تصویر کا ذریعہPCB

دبئی میں میچوں کے پہلے مرحلے کے بعد آج سے پی ایس ایل کا میلہ شارجہ میں سج رہا ہے۔

کوئٹہ کی ٹیم اس وقت پوائنٹس ٹیبل میں چھ پوائنٹس کے ساتھ سرفہرست ہے۔

کوئٹہ گلیڈی ایٹرز نے اب تک دفاعی چیمپیئن اسلام آباد یونائیٹڈ، پشاور زلمی اور ملتان سلطانز کے خلاف میچ کھیلے ہیں جن میں وہ کامیاب رہی ہے۔

،تصویر کا ذریعہPCB

دوسری جانب ملتان سلطانز نے جہاں ٹورنامنٹ کا آغاز ایک شکست سے کیا تھا وہیں دوسرے میچ میں دفاعی چیمپیئن اسلام آباد یونائیٹڈ کی ٹیم پر فتح سے اس کے حوصلے بلند ہو گئے ہیں۔ تاہم تیسرے میچ میں انھیں کوئٹہ گلیڈی ایٹرز کے ہاتھوں شکست کا سامنا کرنا پڑا۔