پی ایس ایل: محمد سمیع کی ہیٹ ٹرک، اسلام آباد یونائیٹڈ کی پشاور زلمی کے خلاف فتح

پی ایس ایل

،تصویر کا ذریعہPCB

،تصویر کا کیپشن

کیرون پولارڈ 22 گیندوں پر 51 رنز بنا کر آؤٹ ہوئے

شارجہ میں جاری پاکستان سپر لیگ کے گیارھویں میچ میں اسلام آباد یونائیٹڈ نے پشاور زلمی کو 12 رنز سے شکست دے دی ہے۔

اس سے پہلے دفاعی چیمپئین اسلام آباد یونائیٹڈ نے پشاور زلمی کو جیتنے کے لیے 159 رنز کا ہدف دیا تھا۔ جواب میں زلمی کی پوری ٹیم آخری اوور میں 146 رنز بنا کر آؤٹ ہو گئی۔

میچ کے آخری اوور میں پشاور زلمی کو جیتنے کے لیے 19 رنز درکار تھے جبکہ اس کی تین وکٹیں باقی تھیں تاہم اسلام آباد یونائیٹڈ کے کپتان محمد سمیع کی ہیٹ ٹرک کی بدولت زلمی کو 12 رنز سے شکست کا سامنا کرنا پڑا۔

آخری اوور میں محمد سمیع نے وہاب ریاض، عمید آصف اور حسن علی کی وکٹیں حاصل کیں۔ محمد سمیع کو مین آف دی میچ قرار دیا گیا جس کے بعد ان کا کہنا تھا کہ یہ ان کے کریئر کی ساتویں ہیٹ ٹرک تھی۔

اس سے پہلے ہدف کے تعاقب میں زلمی نے بیٹنگ کا آغاز کیا تو اوپنر کامران اکمل سات رنز جبکہ ڈیوڈ میلان صرف ایک رن بنا کر محمد موسی کا شکار بنے۔ تیسرے آؤٹ ہونے والے بلے باز امام الحق تھے جو 18 رنز بنا کر فہیم اشرف کی گیند پر محمد سمیع کے ہاتھوں کیچ آؤٹ ہوئے۔

عمر امین 14 رنز بنا کر سمتھ پٹیل کی گیند پر کیچ آؤٹ ہوئے جبکہ لییم ڈاسن 21 رنز بنا کر شاداب خان کی گیند پر آؤٹ ہوئے۔

چھٹے آؤٹ ہونے والے بلے باز کیرون پولارڈ تھے جو 22 گیندوں پر 51 رنز بنا کر فہیم اشرف کی گیند پر کیچ آؤٹ ہوئے جبکہ ڈیرن سیمی 11 رنز بنا کر محمد موسیٰ کی گیند پر آؤٹ ہوئے۔

اسلام آباد یونائیٹڈ کی جانب سے محمد سمیع اور محمد موسیٰ تین، تین وکٹیں لے کر نمایاں بولرز رہے جبکہ فہیم اشرف نے دو اور سمتھ پٹیل اور شاداب خان نے ایک، ایک کھلاڑی کو آؤٹ کیا۔

،تصویر کا ذریعہPCB

اسلام آباد یونائیٹڈ کی اننگز

پشاور زلمی نے ٹاس جیت کر اسلام آباد یونائیٹڈ کو بیٹنگ کی دعوت دی تھی۔ یونائیٹڈ مقررہ 20 اوورز میں نو وکٹوں کے نقصان پر 158 رنز بنائے تھے۔

زلمی کی جانب سے 29 رنز کے عوض تین وکٹیں لے کر سمین گل آفریدی نمایاں بولر رہے جبکہ حسن علی نے دو، عمید آصف، وہاب ریاض اور پولرڈ نے ایک، ایک کھلاڑی کو آؤٹ کیا۔

یونائیٹڈ کے آئن بیل 46 گیندوں پر 54 رنز بنا کر نمایاں بلے باز رہے۔

،تصویر کا ذریعہPCB

،تصویر کا کیپشن

محمد موسیٰ

32 کے مجموعی سکور پر زلمی کو پہلی کامیابی ملی جب اوپنر لیوک رونکی 21 رنز بنا کر سمین گل کی گیند پر کیچ آؤٹ ہوئے۔ دوسرے آؤٹ ہونے والے بلے باز صاحبزادہ فرحان تھے جو 15 رنز بنا کر سمین گل کا ہی شکار بنے۔

تیسری وکٹ حسین طلعت کی گری جو بغیر کوئی رن بنائے پولرڈ کی گیند پر آؤٹ ہوئے جبکہ کیمرون ڈیلپورٹ 29 رنز بنا کر حسن علی کی گیند پر بولڈ ہوئے۔

آؤٹ ہونے والے پانچویں بلے باز آصف علی تھے جو 13 رنز بنا کر سمین گل کا شکار ہوئے جبکہ فہیم اشرف صرف دو ہی رنز بنا پائے۔ ساتویں آؤٹ ہونے والے کھلاڑی شاداب خان تھے جو چھ رنز بنا کر وہاب ریاض کی گیند پر بولڈ ہوئے جبکہ سمتھ پٹیل پانچ رنز بنا پائے۔

،تصویر کا ذریعہPCB

،تصویر کا کیپشن

پی ایس ایل کے چوتھے ایڈیشن میں اب تک ہونے والے میچوں کے نتیجے میں پشاور زلمی دوسری بہترین ٹیم بن کر ابھری ہے

پی ایس ایل کے چوتھے ایڈیشن میں اب تک ہونے والے میچوں کے نتیجے میں پشاور زلمی دوسری بہترین ٹیم بن کر ابھری ہے اور تین میچ کھیلنے کے بعد اس کے چار پوائنٹس ہیں۔

پشاور زلمی کو اس سیزن کے اپنے پہلے میچ میں کوئٹہ گلیڈی ایٹرز کے ہاتھوں شکست ہوئی تھی تاہم دوسرے اور تیسرے میچ میں فتح زلمی کے نام رہی۔

یہ بھی پڑھیے

دفاعی چیمپین اسلام آباد یونائیٹڈ بھی اس سے پہلے تین میچ کھیلی تھی اور صرف ایک میچ میں اسے کامیابی ملی۔ پوائنٹس ٹیبل پر اس کے پوائنٹس کی تعداد دو تھی۔

لاہور قلندرز کے خلاف پہلے میچ میں یونائیٹڈ نے فتح سمیٹی تاہم بعد کے دو میچوں میں اسے ملتان سلطانز اور کوئٹہ گلیڈی ایٹرز کے ہاتھوں شکست کا سامنا کرنا پڑا تھا۔

،تصویر کا ذریعہPCB

،تصویر کا کیپشن

یونائیٹڈ کے آئن بیل 46 گیندوں پر 54 رنز بنا کر نمایاں بلے باز رہے

پی ایس ایل کے گذشتہ تین ایڈیشنز میں زلمی اور یونائیٹڈ کی ٹیمیں آٹھ بار آمنے سامنے آ چکی ہیں۔ پانچ دفعہ اسلام آباد یونائیٹڈ فتح یاب رہی جبکہ تین بار زلمی نے فتح سمیٹی۔

اسلام آباد یونائیٹڈ کی ٹیم لوک رونکی، صاحبزادہ فرحان، آئن بیل، کیمرون ڈیلپورٹ، حسین طلعت، آصف علی، سمتھ پٹیل، شاداب خان، فہیم اشرف، محمد سمیع اور محمد موسی پر مشتمل ہے۔

جبکہ پشاور زلمی کامران اکمل، امام الحق، عمر امین، ڈیوڈ میلان، کیرون پولارڈ، لییم ڈاسن، ڈیرن سیمی، وہاب ریاض، حسن علی، عمید آصف اور سمین گل آفریدی پر مشتمل ہے۔