مکی آرتھر نیوزی لینڈ کے ہاتھوں انگلینڈ کی شکست کے لیے پرامید

مکی آرتھر تصویر کے کاپی رائٹ Getty Images
Image caption مکی آرتھر کے مطابق پاکستانی کھلاڑی سخت محنت کررہے ہیں اور وہ بلاخوف و خطر کھیل رہے ہیں

پاکستانی کرکٹ ٹیم کے ہیڈ کوچ مکی آرتھر انڈیا اور انگلینڈ کے میچ کے نتیجے سے سخت مایوس ہوئے ہیں اور اب انھیں امید ہے کہ نیوزی لینڈ انگلینڈ کو شکست دے کر پاکستان کی سیمی فائنل تک رسائی کی امید کو برقرار رکھے گا۔

بی بی سی سے بات کرتے ہوئے مکی آرتھر نے کہا کہ دوسری ٹیموں کے نتائج پر ہمارا کوئی کنٹرول نہیں ہے البتہ انھیں اس بات پر سخت مایوسی ہوئی کہ انڈین ٹیم انگلینڈ کے خلاف نہیں جیت سکی۔

انھوں نے کہا کہ اگر انڈین ٹیم جیت جاتی تو پاکستان کے لیے دروازے کھل جاتے، ظاہر ہے کہ بھارت اور انگلینڈ کے میچ کا نتیجہ ہمارے لیے بہت ہی مایوس کن تھا۔

مکی آرتھر کا کہنا ہے کہ وہ امید کرتے ہیں کہ نیوزی لینڈ کی ٹیم ہمارے لیے کام کر دکھائے گی اور اگر نیوزی لینڈ کی ٹیم میچ نہیں جیت پاتی تو ہم امید کر رہے ہیں کہ انگلینڈ بہت ہی بڑے مارجن سے میچ جیتے جس کے بعد ہم بیٹھ کر رن ریٹ کا حساب کتاب کریں جو ظاہر ہے کہ بہت زیادہ ہے۔

یہ بھی پڑھیے

انڈیا کی شکست کا ذمہ دار کون، دھونی یا نئی جرسی؟

جب مکی آرتھر کا سر بے یقینی میں جھک گیا

اولڈ ٹریفرڈ سے ہم نے کیا سیکھا

مکی آرتھر نے یہ بھی کہا کہ انگلینڈ کو ہرانے کے بعد پاکستانی ٹیم میں اعتماد پیدا ہوا تھا لیکن بارش اور خراب موسم کی وجہ سے وہ نو دن تک نہ کھیل سکی جس سے اس کا تسلسل ٹوٹ گیا تھا۔

ان کا کہنا تھا کہ ’ٹیم آخری تین میچوں میں بہت اچھا کھیلی ہے اور کھلاڑی سخت محنت کررہے ہیں اور وہ بلاخوف و خطر کھیل رہے ہیں۔‘

تصویر کے کاپی رائٹ Getty Images

مکی آرتھر اوپنرز فخرزمان اور امام الحق کی جانب سے بڑا سکور نہ کرنے پر فکرمند نہیں ہیں۔ ان کا کہنا ہے کہ یہ ٹیم کو اچھا آغاز فراہم کرنے میں کامیاب ہوئے ہیں اور انھیں امید ہے کہ یہ آئندہ بڑا سکور کریں گے۔

واضح رہے کہ پاکستانی کرکٹ ٹیم کو جمعے کے روز لارڈز کے میدان میں بنگلہ دیش سے مقابلہ کرنا ہے لیکن اس سے قبل بدھ کے روز انگلینڈ اور نیوزی لینڈ کا میچ پاکستان کی سیمی فائنل تک رسائی کے نقطہ نظر سے بڑی اہمیت کا حامل ہے۔

اگر انگلینڈ کی ٹیم یہ میچ ہارجاتی ہے اور پاکستان بنگلہ دیش کو ہرا دیتا ہے تو انگلینڈ ورلڈ کپ سے باہر اور پاکستان سیمی فائنل میں پہنچ جائے گا لیکن اگر انگلینڈ کی ٹیم میچ جیت جاتی ہے تو پاکستان کی بنگلہ دیش سے جیت کی صورت میں پاکستان اور نیوزی لینڈ کے گیارہ گیارہ پوائنٹس ہوں گے تاہم نیوزی لینڈ کا رن ریٹ بہت بہتر ہے۔

اسی بارے میں