نیوزی لینڈ نے انڈیا کو ولنگٹن ٹیسٹ میچ میں دس وکٹوں سے ہرا دیا

انڈین ٹیم

،تصویر کا ذریعہGetty Images

،تصویر کا کیپشن

انڈین کپتان وراٹ کوہلی اس ٹیسٹ میچ کی دونوں اننگز میں بڑا سکور نہ کر سکے

نیوزی لینڈ نے دو کرکٹ ٹیسٹ میچوں کی سیریز کے پہلے میچ میں انڈیا کو باآسانی دس وکٹوں سے شکست دے کر سیریز میں ایک صفر سے برتری حاصل کر لی ہے۔

ولنگٹن کے بیسن ریزرو سٹیڈیم میں کھیلے جانے والے میچ کا فیصلہ چوتھے دن کی صبح دوسرے گھنٹے ہی ہو گیا جب انڈیا کی جانب سے دیا گیا نو رنز کا ہدف میزبان ٹیم نے بغیر کسی نقصان کے حاصل کر لیا۔

پیر کو جب کھیل شروع ہوا تو انڈیا نے اپنی دوسری اننگز چار وکٹوں پر 144 رنز سے دوبارہ شروع کی اور اسے دن کے تیسرے اوور میں ہی اس وقت پانچواں نقصان اٹھانا پڑا جب اجنکیا رہانے بولٹ کی گیند پر پویلین لوٹ گئے۔

یہ بھی پڑھیے

اگلے ہی اوور میں ٹم ساؤدی نے جب ہنوما وہاڑی کو بولڈ کیا تو انڈیا کی ٹیم پر اننگز کی شکست کا خطرہ منڈلانے لگا۔

رشبھ پانٹ اور ایشانت سرما کی مختصر مگر اہم اننگز انڈیا کو اس خطرے سے تو نکالنے میں کامیاب رہیں لیکن پوری انڈین ٹیم 191 رنز بنا کر پویلین لوٹ گئی اور یوں اسے نیوزی لینڈ پر صرف آٹھ رنز کی برتری ملی۔

نیوزی لینڈ کی جانب سے ساؤدی 61 رنز کے عوض پانچ وکٹیں لے کر سب سے کامیاب بولر رہے جبکہ ان کے ساتھی فاسٹ بولر ٹرینٹ بولٹ نے 39 رنز کے عروض چار کھلاڑیوں کو پویلین پہنچایا۔

ساؤدی کو ولنگٹن ٹیسٹ میں نو وکٹیں لینے پر میچ کا بہترین کھلاڑی بھی قرار دیا گیا۔

،تصویر کا ذریعہGetty Images

،تصویر کا کیپشن

کین ولیمسن نے نیوزی لینڈ کی جانب سے پہلی اننگز میں نصف سنچری بنائی تھی

21 فروری کو شروع ہونے والے اس میچ میں نیوزی لینڈ نے ٹاس جیت کر پہلے بولنگ کرنے کا فیصلہ کیا تھا اور انڈیا کی ٹیم پہلی اننگز میں ساؤدی اور اپنا پہلا ٹیسٹ کھیلنے والے کائل جیمیسن کی تباہ کن بولنگ کے سامنے زیادہ دیر نہیں ٹھہر سکی تھی اور 165 رنز بنا کر آؤٹ ہو گئی تھی۔

اس کے جواب میں نیوزی لینڈ نے اپنی پہلی اننگز میں نصف سنچری بنانے والے کین ولیمسن کے علاوہ راس ٹیلر،جیمیسن اور گرینڈہوم کی ذمہ دارانہ بلے بازی کی بدولت 348 رنز بنائے تھے۔

یہ نیوزی لینڈ کی ٹیسٹ کرکٹ میں سوویں اور دس وکٹوں سے پانچویں جیت ہے اور ان پانچ میں سے تین بار اس کی مدِمقابل ٹیم انڈیا ہی تھی۔

انڈین ٹیم کا دورۂ نیوزی لینڈ اب تک ملا جلا رہا ہے۔ دورے کے آغاز پر پانچ میچوں کی ٹی ٹوئنٹی سیریز میں مہمان ٹیم نے پانچ صفر سے وائٹ واش کیا تو تین میچوں کی ون ڈے سیریز میں خود اسے اس ہزیمت کا سامنا کرنا پڑا۔

اب دو میچوں کی ٹیسٹ سیریز میں نیوزی لینڈ کو ناقابلِ شکست برتری مل چکی ہے اور دیکھنا ہو گا کہ کیا انڈین ٹیم 29 فروری سے شروع ہونے والا دوسرا میچ جیت کر سیریز برابر کر سکتی ہے یا ون ڈے کے بعد ٹیسٹ سیریز میں بھی شکست ہی اس کا مقدر بنتی ہے۔