ٹی ٹوئنٹی وارم اپ میچ میں بھارت کی جیت

آخری وقت اشاعت:  ہفتہ 15 ستمبر 2012 ,‭ 13:08 GMT 18:08 PST
عرفان پٹھان اور مہندر سنگھ دھونی

عرفان پٹھان اور مہندر سنگھ دھونی نے وارم اپ میچ میں بہتر کار کردگی پیش کی

بھارت نے کپتان مہندر سنگھ دھونی کی شاندار بلے بازی اور عرفان پٹھان کی بہترین گیند بازی کی بدولت ٹی ٹوئنٹی ورلڈ کپ کے وارم اپ میچ میں سری لنکا کو چھبیس رن سے شکست دے دی ہے۔

بھارت نے پہلے بلے بازی کر تے ہوئے مقررہ بیس اوروں میں پانچ وکٹ کے نقصان پر ایک سو چھیالیس رنز بنائے۔ کپتان دھونی بیالیس گیندوں میں پچپن رنز اور روہت شرما چھبیس گیندوں میں سینتیس رنز کے ساتھ نمایاں کھلاڑی رہے۔

كولبو میں کھیلے گئے میچ میں بھارت نے ٹاس جیتا اور بلے بازی کا فیصلہ کیا لیکن گمبھیر پانچ رنز پر چوٹ لگنے کی وجہ سے کھیل جاری نہ رکھ سکے۔ ویرندر سہواگ اور سریش رائنا بارہ بارہ رنز بنا کر آؤٹ ہو گئے۔

کینسر سے نجات پانے کے بعد حال ہی میں ٹیم میں واپسی کرنے والے یوراج سنگھ میچ میں کچھ زیادہ نہیں کر پائے اور 11 رنز بنا کر آؤٹ ہو گئے۔

ایک وقت پر صرف اکیاون رنز کے سکور پر بھارت کے چار کھلاڑی آؤٹ ہو چکے تھے لیکن پھر شرما اور دھونی نے اننگز کو سنبھال لیا اور بھارت ایک اچھا ہدف دینے میں کامیاب رہا۔

جواب میں سری لنکا کی شروعات اچھی نہیں رہی اور عرفان پٹھان نے شروع ہی میں اوپنرتلک رتنے دلشان اور مناویرا کو ایک اور تین کے سکور پر آوٹ کر دیا۔

خراب شروعات کے بعد سنگاکارا نے اننگز کو سنبھالنے کی کافی کوشش کی مڈل آرڈر کے بلے بازوں نے بھی سنبھالنے کی کافی کوشش کی لیکن ایک بار پھر عرفان پٹھان نے ان کی جوڑی کو توڑ دیا۔

بھارتی بولرز کے سامنے سری لنکا کے بلے باز نہیں چل پائے اور ان کے آخری پانچ وکٹ صرف سات گیندوں میں دو رنز کے عوض گر گئے اور پوری ٹیم انیس اعشاریہ تین گیندوں میں ایک سو بیس رنز پر آؤٹ ہو گئی۔

عرفان پٹھان نے چار اوورز میں پچیس رنز دے کر پانچ وکٹیں لیں جبکہ لکشمی پتی بالاجی نے تین اعشاریہ تین اوورز میں اٹھائیس رنز کے عوض تین وکٹیں لیں۔

سری لنکا کی جانب سے سگاكارا نے سب سے زیادہ بتیس رن بنائے اور انہیں ہر بھجن سنگھ نے کلین بولڈ کیا۔

اسی بارے میں

متعلقہ عنوانات

BBC © 2014 بی بی سی دیگر سائٹوں پر شائع شدہ مواد کی ذمہ دار نہیں ہے

اس صفحہ کو بہتیرن طور پر دیکھنے کے لیے ایک نئے، اپ ٹو ڈیٹ براؤزر کا استعمال کیجیے جس میں سی ایس ایس یعنی سٹائل شیٹس کی سہولت موجود ہو۔ ویسے تو آپ اس صحفہ کو اپنے پرانے براؤزر میں بھی دیکھ سکتے ہیں مگر آپ گرافِکس کا پورا لطف نہیں اٹھا پائیں گے۔ اگر ممکن ہو تو، برائے مہربانی اپنے براؤزر کو اپ گریڈ کرنے یا سی ایس ایس استعمال کرنے کے بارے میں غور کریں۔