محمد عرفان پھر ان فٹ، ایشیا کپ سے باہر

تصویر کے کاپی رائٹ Getty
Image caption محمد عرفان جنوبی افریقہ کے خلاف دوسرے ٹی ٹوئنٹی کے دوران کولہے میں ہیرلائن فریکچر ہونے کے سبب چھ ہفتے کے لیے کرکٹ سے دور ہوگئے تھے

پاکستانی کرکٹ ٹیم کے فاسٹ بولر محمد عرفان ایک بار پھر ان فٹ ہوکر ایشیا کپ سے باہر ہوگئے ہیں جبکہ ڈاکٹرز کی رپورٹ کی روشنی میں ان کی ورلڈ ٹی ٹوئنٹی ٹیم میں شمولیت کا فیصلہ کیا جائے گا۔

ایشیا کپ اور ورلڈ ٹی ٹوئنٹی کے لیے ٹیموں کا اعلان ایک دو روز میں متوقع ہے۔

سات فٹ ایک انچ کے طویل قامت محمد عرفان گزشتہ سال دسمبر میں جنوبی افریقہ کے خلاف دوسرے ٹی ٹوئنٹی کے دوران کولہے میں ہیرلائن فریکچر ہونے کے سبب چھ ہفتے کے لیے کرکٹ سے دور ہوگئے تھے اب انہیں اسی جگہ دوبارہ تکلیف ہوئی ہے۔

عرفان راولپنڈی اسلام آباد میں جاری ٹی ٹوئنٹی کپ میں ملتان کی نمائندگی کررہے تھے کہ انہیں تکلیف کے سبب ٹورنامنٹ چھوڑ کر لاہور جاناپڑا جہاں ان کا ایم آر آئی کرایا گیا جس کی رپورٹ کے بعد سلیکٹرز ورلڈ ٹی ٹوئنٹی میں ان کی شرکت کا فیصلہ کریں گے۔

سلیکشن کمیٹی نے کوچ معین خان اور دونوں کپتانوں مصباح الحق اور محمد حفیظ کے ساتھ مشاورت کی ہے۔

ون ڈے ٹیم میں فواد عالم کی واپسی کا امکان ہے جنہوں نے اس سیزن میں شاندار بیٹنگ کرتے ہوئے پریذیڈ نٹ کپ ایک روزہ ٹورنامنٹ میں دو سنچریوں اور دو نصف سنچریوں کی مدد سے چار سو اڑتیس رنز بنائے ہیں۔

اس کے عاوہ پریذیڈنٹ ٹرافی فرسٹ کلاس کرکٹ کے دس میچوں میں انہوں نے دو سنچریوں اور چار نصف سنچریوں کی مدد سے چھ سو اٹھاون رنز بنائے ہیں۔

ٹی ٹوئنٹی ٹیم میں کامران اکمل اور شعیب ملک کی واپسی بھی متوقع ہے۔ کامران اکمل کو سلیکشن کمیٹی اوپنر کے طور پر موقع دینے کے بارے میں سوچ رہی ہے۔

اسی بارے میں