’صرف ایک میچ نہیں، پورا ٹورنامنٹ اچھا کھیلنا ہے‘

تصویر کے کاپی رائٹ ICC
Image caption محمد حفیظ اس بات کے بارے میں پریشان نہیں کہ پاکستان نے بھارت کو ورلڈ ٹی ٹوئنٹی مقابلوں میں شکست نہیں دی

بین الاقوامی کرکٹ کی روایتی دلچسپی کو اپنے نقطہ عروج پر پہنچانے والی پاک بھارت کرکٹ سے آئی سی سی ورلڈ ٹی ٹوئنٹی کا آغاز ہو رہا ہے۔

دونوں ٹیمیں جمعہ کے روز میرپور کے شیرِ بنگلہ سٹیڈیم میں مدمقابل ہو رہی ہیں۔

اچھا ہے کہ پہلا میچ بھارت کے خلاف ہے: محمد حفیظ

ایک ٹیم کے پاس ٹی ٹوئنٹی کا سب سے کامیاب بولنگ اٹیک ہے اور دوسری ٹیم کو اپنے بلے بازوں کی لمبی قطار پر ناز ہے۔

پاکستان نے ابھی تک ورلڈ ٹی ٹوئنٹی مقابلوں میں بھارت کو شکست نہیں دی ہے لیکن کپتان محمد حفیظ اسے تاریخ اور ماضی سمجھ کر آگے بڑھنے کی بات کرتے ہیں۔

محمد حفیظ کا کہنا ہے کہ پاکستانی ٹیم صرف بھارت کو ہرانے کی سوچ کے ساتھ یہ ٹورنامنٹ نہیں کھیل رہی ہے بلکہ وہ چاہتی ہے کہ پورے ٹورنامنٹ میں اچھی کارکردگی کا مظاہرہ کرے۔

پاکستانی بیٹنگ بدھ کے روز جنوبی افریقہ کے خلاف وارم اپ میچ میں لڑکھڑا گئی تھی تاہم محمد حفیظ کا کہنا ہےکہ انھیں بیٹنگ پر تشویش نہیں ہے کیونکہ ٹیم کے پاس اچھے بلے باز موجود ہیں۔ وہ کہتے ہیں کہ کسی بھی ٹیم کو اچھے اور برے دنوں کا سامنا کرنا پڑتا ہے۔ ’پاکستانی ٹیم دو وارم اپ میچوں سے جو مقصد حاصل کرنا چاہتی تھی وہ حاصل کرلیا۔‘

محمد حفیظ نے کہا کہ جو بھی کھلاڑی بہترین فارم میں ہوگا اس سے کام لیا جائے گا۔

شاہد آفریدی کے بارے میں سوال پر پاکستانی کپتان کا کہنا ہے کہ ان کی خواہش ہوگی کہ شاہد آفریدی ایشیا کپ کی کارکردگی دہرائیں، وہ اس وقت فارم میں ہیں اور فٹ بھی ہوچکے ہیں۔

محمد حفیظ کو اس بات کی خوشی ہے کہ عمرگل دوبارہ ردھم حاصل کر چکے ہیں اور انھوں نے دونوں وارم اپ میچوں میں عمدہ بولنگ کی ہے۔

انھوں نے کہا کہ پاکستانی ٹیم بنگلہ دیش کی کنڈیشنز کے بارے میں کافی جان چکی ہے لیکن بھارتی ٹیم کو بھی یہاں کی کنڈیشنز کا خاصا تجربہ ہے۔ ’اس کی بیٹنگ مضبوط ہے لہٰذا پاکستانی ٹیم کو اپنے گیم پلان پر عمل کرنا ہوگا۔‘

اسی بارے میں