شوماکر کے ’ہوش کے لمحے‘

تصویر کے کاپی رائٹ AFP
Image caption شوماکر کی صحت ’میں بہتری کے آثار نظر آئے ہیں۔‘

مہینوں بے ہوش رہنے کے بعد فارمولا ون کے چیمپیئن شو ماکر میں ’ہوش کے لمحے‘ دکھائی دیے ہیں۔

کاروں کی دوڑ کے عالمی چیمپیئن کی ایجنٹ سبین کیھم نے ذرائع ابلاغ کو جاری کیے جانے والے ایک بیان میں کہا ہے کہ وہ شوماکر کے ہوش میں آنے کے بارے میں پر اعتماد ہیں کیونکہ ان کی صحت ’میں بہتری کے آثار نظر آئے ہیں۔‘

فرانس میں زیر علاج شوماکر کے ڈاکٹر انہیں بے ہوشی سے نکالنے میں مصروف ہیں۔ یاد رہے کہ فرانس میں 29 دسمبر کوسکیئنگ کے دوران شدید زخمی ہونے کے بعد سے شوماکر گرینوبل کے ہسپتال میں زیرِ علاج ہیں اور ڈاکٹروں نے انہیں کومے میں رکھا ہوا ہے۔

بیان میں سبین کیھم نے کہا ہے کہ ’ہم ڈاکٹروں کی ٹیم کے ہمراہ اس طویل اور مشکل جنگ میں شوماکر کے ساتھ کھڑے ہیں۔ ہم آپ کی مسلسل ہمدردی پر آپ کے مشکور ہیں، تاہم ہم درخواست کرتے ہیں کہ آپ ہماری مجبوری کو سمجھیں کہ ہم ان کی صحت کے بارے میں اس سے زیادہ تفصیلات بتانے کا ارادہ نہیں رکھتے۔‘

سکیئنگ کے دوران پیش آنے والے اس حادثے کی تحقیقات کرنے والے ماہرین کا کہنا ہے کہ جب میربل کے پہاڑوں میں یہ حادثہ پیش آیا اس وقت شوماکر کی رفتار ’سکیئنگ کے اچھے کھلاڑی‘ جتنی ہی تھی۔

جرمنی سے تعلق رکھنے والے مائیکل شوماکر جنہوں نے 2012 میں دوسری بار ریٹائرمنٹ لی، کو فرنچ الپس کے پہاڑی سلسلے میں واقع ایک الپائن ریزورٹ میں سکیئنگ کے دوران اس وقت سر پر چوٹ آئی تھی جب ان کا سر ایک چٹان سے ٹکرا گیا تھا۔اس ٹکراؤ کے نتیجے میں ان کا ہیلمٹ ٹوٹ گیا تھا جسے بعد میں حادثے کی تحقیات کرنے والے ماہرین کے حوالے کر دیا گیا تھا تا کہ وہ ہیلمٹ پر لگے ہوئے کیمرے میں ریکارڈ شدہ مواد کی مدد سے حادثے کی وجوہات جان سکیں۔

شو ماکر کے کومے کے دوران گذرنے والی ان کی سالگرہ کے موقع پر ان کے مداحوں کے پیغامات کے جواب میں شوماکر کے خاندان کا کہنا تھا کہ وہ فراری کے مداحوں کی جانب سے ’ہمدردی کے جذبات اور پیغامات‘ سے اشک بار ہوگئے۔

اسی بارے میں