ہوزے موہیکا کی فیفا پر تنقید
تصویر کے کاپی رائٹ
Getty
یوروگوائے کے صدر ہوزے موہیکا نے فٹبال کی عالمی تنظیم فیفا کی جانب سے لوئس سواریس کو چار ماہ کی پابندی کی سزا سنانے پر گالی دیتے ہوئے کہا ہے کہ لوئس سواریس کو دی گئی سزا فسطائیت پر مبنی پابندی ہے۔
واضح رہے کہ فیفا نے یوروگوائے کے مشہور کھلاڑی لوئس سواریس کو اطالوی کھلاڑی کو کاٹنے پر نو انٹرنیشنل میچوں کی پابندی، جرمانے اور چار ماہ تک فٹبال سرگرمیوں سے دور رہنے کی سزا سنائی ہے جو ایک ریکارڈ سزا ہے۔
ہوزے موہیکا نے یہ بیان یوروگوائے کی ٹیم کے اعزاز میں دیے جانے والی ایک استقبالیہ تقریب میں سرکاری ٹی وی کو دیا۔
یوروگوائے کے صدر نے یہ بیان دے کر اپنے منہ پر ہاتھ رکھ لیا تاہم جب صحافیوں نے ان سے پوچھا کہ آیا وہ اپنے بیان کی تصیح کرنا چاہتے ہیں تو انھوں نے صحافیوں سے کہا کہ وہ ان کے بیان کو شائع کریں۔
اس سے پہلے ہوزے موہیکا نے کہا تھا کہ فیفا نے لوئس سواریس کو اس لیے سزا دی کیونکہ ان کا تعلق امیر خاندان سے نہیں تھا۔
یوروگوائے کے صدر نے فیفا کے فیصلے کو اپنے ہفت روزہ ریڈیو خطاب کے دوران تنقید کا نشانہ بنایا۔
دوسری جانب یوروگوائے کی فٹبال فیڈریشن کا کہنا ہے کہ وہ فیفا کے فیصلے کے خلاف اپیل کرے گی۔