ساؤتھیمپٹن : انگلینڈ نے بھارت کو 266 رنز سے ہرا دیا

تصویر کے کاپی رائٹ Reuters
Image caption بھارت اور انگلینڈ کے درمیان پانچ ٹیسٹ میچوں کی یہ سیریز ایک ایک سے برابر ہو گئی ہے جبکہ دو میچ ابھی باقی ہیں

ساؤتھیمپٹن میں کھیلے جانے والے تیسرے ٹیسٹ میچ کے پانچویں دن انگلینڈ نے بھارت کو 266 رنز کے مارجن سے شکست دے دی ہے۔

بھارت کی ٹیم 445 رنز کے ہدف کے تعاقب میں دوسری اننگز میں صرف 178 رنز بنا کر پویلین لوٹ گئی۔

میچ کا تفصیلی سکور کارڈ

اس میچ کی ایک خاص بات انگلینڈ کے کپتان ایلسٹر کک کی فارم میں واپسی ہے۔ انھوں نے پہلی اننگز میں 95 اور دوسری میں 70 رنز بنائے۔

اس میچ سے قبل ان کی کارکردگی پر شدید تنقید کی جا رہی تھی اور کئی سابق کھلاڑیوں نے مطالبہ کیا تھا کہ انھیں کپتانی سے ہٹا دیا جائے۔

اسی میچ میں انگلینڈ کے بولر اینڈرسن نے سات کھلاڑیوں کو آؤٹ کیا اور مین آف دی میچ قرار پائے۔

بھارت کی جانب سے اجنکارہانے اور روہت شرما نے چار وکٹوں کے نقصان پر 112 رنز کے ساتھ پانچویں دن کے کھیل کا آغاز کیا۔

بھارت کی آخری چھ وکٹیں مجوعی سکور میں صرف 66 رنز کا اضافہ کر سکیں۔

انگلینڈ کے بولر معین علی نے بھارت کی شکست میں اہم کردار ادا کیا۔انھوں نے انگلینڈ کی جانب سے دوسری اننگز میں چھ وکٹیں حاصل کیں۔

اس سے پہلے انگلینڈ نے دوسری اننگز میں چار وکٹوں کے نقصان پر 205 رنز بنا کر اپنی باری ڈکلئیر کر دی تھی۔

دونوں ٹیموں کے درمیان پہلا ٹیسٹ ہار جیت کے فیصلے کے بغیر ختم ہوا تھا جبکہ لارڈز ٹیسٹ میں بھارت نے انگلینڈ کو 95 رنز سے شکست دی تھی۔

اسی بارے میں