کولمبو میں جنید اور وہاب کی عمدہ بولنگ

تصویر کے کاپی رائٹ Reuters
Image caption پاکستان کی جانب سے جنید خان نے چار اور وہاب ریاض نے تین کھلاڑیوں کو آؤٹ کیا

کولمبو ٹیسٹ میچ کے پہلے دن کھیل کے اختتام پر سری لنکا نے پاکستان کے خلاف پہلی اننگز میں آٹھ وکٹوں کے نقصان پر 261 رنز بنائے ہیں۔

جمعرات کو شروع ہونے والے ٹیسٹ میچ میں سری لنکا نے ٹاس جیت کر پہلے بیٹنگ کرنے کا فیصلہ کیا تھا۔

میچ کا تفصیلی سکور کارڈ

سری لنکا کی جانب سے اوپل تھرنگا اور کوشل پریرا نے اننگز کا آغاز کیا اور دونوں بلے بازوں نے پہلی وکٹ کی شراکت میں 79 رنز بنائے۔

سری لنکا کی جانب سے اوپل تھرنگا نے 12 چوکوں کی مدد سے 92 جبکہ کوشل سلوا نے چھ چوکوں کی مدد سے 41 رنز بنائے۔

ان دونوں بلے بازوں کے علاوہ سری لنکا کے دیگر کھلاڑی نمایاں کارکردگی کا مظاہرہ نہ کر سکے اور ان کی وکٹیں وقفے وقفے سے گرتی رہیں۔

اپنا آخری ٹیسٹ کھیلنے والے مہیلا جیاوردھنے صرف چار رنز بنا کر آؤٹ ہوئے۔

میچ کے پہلے دن کی خاص بات پاکستانی بولروں کی عمدہ بولنگ تھی۔ پاکستان کی جانب سے جنید خان نے چار اور وہاب ریاض نے تین کھلاڑیوں کو آؤٹ کیا۔

یاد رہے کہ پاکستانی ٹیم گال ٹیسٹ میں سات وکٹوں کی ہزیمت کے سبب سری لنکا کے خلاف پانچ سال میں تیسری ٹیسٹ سیریز ہارنے کے خطرے سے دوچار ہے۔

پاکستانی ٹیم مصباح الحق کی قیادت میں انگلینڈ کے خلاف کلین سویپ کے بعد سے ایک بھی ٹیسٹ سیریز نہیں جیت سکی ہے۔ اس دوران اس نے تین سیریز برابر کھیلی ہیں اور دو میں اسے شکست ہوئی ہے ۔

اسی بارے میں