بھارت 408 پر آؤٹ، آسٹریلوی بلے بازوں کی تیز بیٹنگ

تصویر کے کاپی رائٹ AFP
Image caption یہ 25 سالہ سٹیو سمتھ کا بطور آسٹریلوی کپتان پہلا ٹیسٹ میچ ہے

برزبین میں کھیلے جانے والے دوسرے کرکٹ ٹیسٹ میچ کے دوسرے دن کھیل کے اختتام پر بھارت کے 408 رنز کے جواب میں آسٹریلیا نے پہلی اننگز میں چار وکٹوں پر 221 رنز بنا لیے۔

جب کھیل ختم ہوا تو کریز پر اس وقت کپتان سٹیون سمتھ اور مچل مارش موجود تھے اور میزبان ٹیم کو بھارت کی برتری ختم کرنے کے لیے مزید 187 رنز درکار ہیں۔

میچ کا سکور کارڈ

سٹیو سمتھ نے بطور کپتان اپنے پہلے ٹیسٹ میں نصف سنچری بنائی ہے اور آسٹریلوی بلے بازوں نے تیز اور جارحانہ انداز میں بلے بازی کی ہے۔

ان سے پہلے آسٹریلیا کی جانب سے اوپنر کرس روجرز نے بھی دس چوکوں کی مدد سے نصف سنچری بنائی جبکہ وارنر اور واٹسن زیادہ دیر کریز پر تو نہیں رہے لیکن دونوں نے جارحانہ انداز اپنایا۔

اس سے قبل دوسرے دن بھارتی ٹیم اپنی پہلی اننگز میں 408 رنز بنا کر آؤٹ ہوگئی۔

اوپنر مرلی وجے کی سنچری اور مڈل آرڈر میں اجنکیا ریہانے کی ذمہ دارانہ اننگز کے علاوہ دیگر بھارتی بلے باز بڑا سکور کرنے میں ناکام رہے۔

تصویر کے کاپی رائٹ EPA
Image caption مرلی وجے نے ٹیسٹ کرکٹ میں اپنی پانچویں سنچری بنائی

بھارت کی آخری پانچ وکٹیں مجموعی سکور میں 87 رنز کا اضافے کے بعد گریں۔

مرلی وجے نے 22 چوکوں کی مدد سے 144 رنز کی اننگز کھیلی تھی جبکہ ریہانے 81 رنز بنانے کے بعد اننگز کے کامیاب ترین آسٹریلوی بولر ہیزول وڈ کا شکار بنے۔

اپنا پہلا ٹیسٹ کھیلنے والے جوش ہیزل وڈ نے 68 رنز کے عوض پانچ بھارتی کھلاڑیوں کو آؤٹ کیا۔ ان کے علاوہ پہلے میچ کے ہیرو نیتھن لیئون نے تین وکٹیں لیں۔

اس ٹیسٹ سیریز میں آسٹریلیا کو ایک صفر کی سبقت حاصل ہے۔

اس میچ میں بھارت کے مستقل کپتان مہندر سنگھ دھونی کی واپسی ہوئی ہے جبکہ آسٹریلیا کے کپتان کلارک پیٹھ میں تکلیف کی وجہ سے اس میچ میں نہیں ہیں اور ان کی جگہ سٹیون سمتھ کپتانی کی ذمہ داری نبھا رہے ہیں۔

اسی بارے میں