پرتھ: آسٹریلیا نے سہ فریقی کرکٹ سیریز جیت لی

تصویر کے کاپی رائٹ AP
Image caption اتوار کو کھیلے جانے والے فائنل میچ میں انگلینڈ نے ٹاس جیت کر آسٹریلیا کو پہلے بیٹنگ کی دعوت دی تھی

آسٹریلیا میں کھیلی جانے والی سہ فریقی کرکٹ سیریز کے فائنل میں آسٹریلیا نے انگلینڈ کو 112 سے شکست دے دی۔

انگلینڈ کی پوری ٹیم 279 رنز کے ہدف کے تعاقب میں 39.1 اوورز میں 166 رنز بنا کر پویلین لوٹ گئی۔

میچ کا تفصیلی سکور کارڈ

انگلینڈ کی جانب سے معین علی اور ائین بیل نے اننگز کا آغاز کیا۔

انگلینڈ کا آغاز اچھا نہ تھا اور صرف 46 رنز کے مجموعی سکور پر اس کے چار ابتدائی بیٹسمین آؤٹ ہو گئے۔

انگلینڈ کی جانب سے روی بوپارہ نے 33، معین علین نے 26 اور جو روٹ نے 25 رنز بنائے۔

آسٹریلیا کی جانب سے گلین میکس ویل نے چار اور مچل جانسن نے تین کھلاڑیوں کو آؤٹ کیا۔

اس سے پہلے آسٹریلیا نے پہلے بیٹنگ کرتے ہوئے مقررہ 50 اوورز میں آٹھ وکٹوں کے نقصان پر 278 رنز بنائے۔

آسٹریلیا کی جانب سے گلین میکس ویل نے 15 چوکوں کی مدد سے 95 جبکہ مارش نے سات چوکوں اور ایک چھکے کی مدد سے 60 رنز بنائے۔

انگلینڈ کی جانب سے سٹورٹ براڈ نے تین اور جیمز اینڈرسن نے دو کھلاڑیوں کو آؤٹ کیا۔

اتوار کو کھیلے جانے والے فائنل میچ میں انگلینڈ نے ٹاس جیت کر آسٹریلیا کو پہلے بیٹنگ کی دعوت دی تھی۔

آسٹریلیا کے گلین میکس ویل کو مین آف دی میچ قرار دیا گیا۔

اسی بارے میں