مصباح کی ذمہ دارانہ اننگز کی بدولت پاکستان فاتح

تصویر کے کاپی رائٹ Getty
Image caption مصباح الحق نے کپتان کی ذمہ داری کا احساس کرتے ہوئے 99 گیندوں پر 91 رنز بنائے

کرکٹ کے 11ویں عالمی کپ کے آغاز سے قبل پاکستان نے اپنے آخری وارم اپ میچ میں انگلینڈ کو چار وکٹوں سے شکست دے دی ہے۔

سڈنی میں کھیلے جانے والے میچ میں انگلینڈ نے پاکستان کو فتح کے لیے 251 رنز کا ہدف دیا جو اس نے 49ویں اوور میں حاصل کر لیا۔

میچ کا تفصیلی سکور کارڈ

پاکستانی اننگز کی خاص بات کپتان مصباح الحق اور عمر اکمل کی عمدہ بلے بازی رہی۔

مصباح الحق 91 رنز کی اننگز کھیل کر ناٹ آؤٹ رہے جبکہ عمر اکمل نے تین چھکوں اور تین چوکوں کی مدد سے 65 رنز کی اننگز کھیلی۔

ان دونوں کے درمیان 133 رنز کی شراکت ہوئی جس کا خاتمہ سٹورٹ براڈ نے عمر اکمل کو آؤٹ کر کے کیا۔

اس سے قبل پاکستان کے لیے احمد شہزاد اور ناصر جمشید نے اننگز شروع کی تو دوسرے ہی اوور میں براڈ نے ناصر جمشید کو کیچ آؤٹ کروا دیا۔

احمد شہزاد بھی زیادہ دیر کریز پر نہ ٹھہر سکے اور جیمز اینڈرسن کی گیند پر کیچ ہوگئے۔

یونس خان اور حارث سہیل نے 33 رنز کی شراکت قائم کی جس کا خاتمہ جورڈن نے یونس کو آؤٹ کر کے کیا جنھوں نے 19 رنز بنائے۔

تصویر کے کاپی رائٹ Getty
Image caption یاسر شاہ نے ایک ہی اوور میں دو وکٹیں لیں

یونس کی طرح حارث سہیل بھی ایک مرتبہ پھر اچھے آغاز کو بڑی اننگز میں نہ بدل سکے اور 33 رنز بنا کر ٹریڈویل کی گیند پر بیلنس کو کیچ دے بیٹھے۔

بدھ کو انگلینڈ کے کپتان اوئن مورگن نے ٹاس جیتا اور پہلے بلے بازی کرنے کا فیصلہ کیا تو انگلینڈ نےگیری بیلنس اور جوائے روٹ کی نصف سنچریوں کی بدولت آٹھ وکٹوں کے نقصان پر 250 رنز بنائے۔

بیلنس نے 57 رنز کی اننگز کھیلی جبکہ روٹ 85 رنز بنا کر آؤٹ ہوئے۔

ان دونوں کے علاوہ ایلکس ہیلز اور جورڈن نے بھی 31، 31 رنز کی اننگز کھیلیں۔

پاکستان کے لیے یاسر شاہ تین وکٹوں کے ساتھ سب سے کامیاب بولر رہے جبکہ سہیل خان نے دو اور شاہد آفریدی، وہاب ریاض اور احسان عادل نے ایک ایک وکٹ لی۔

یہ ورلڈ کپ سے قبل دونوں ٹیموں کا دوسرا وارم اپ میچ تھا اور دونوں ہی اپنا پہلا وارم اپ میچ جیت چکی تھیں۔

پاکستان نے اپنے میچ میں بنگلہ دیش کو تین وکٹوں سے شکست دی تھی جبکہ انگلینڈ نے ایک یکطرفہ مقابلے کے بعد ویسٹ انڈیز کو ہرایا تھا۔

خیال رہے کہ ان وارم اپ میچوں کو باقاعدہ ون ڈے یا فرسٹ کلاس میچ کا درجہ حاصل نہیں۔

اسی بارے میں