عرفان کے متبادل کے طور پر سمیع، بلاول کے ناموں پر غور

تصویر کے کاپی رائٹ Getty
Image caption بلاول بھٹی ورلڈ کپ سے قبل نیوزی لینڈ کے خلاف دو ون ڈے انٹرنیشنل کھیلے تھے لیکن ان میں خاصے مہنگے ثابت ہوئے

پاکستانی کرکٹ ٹیم ان فٹ فاسٹ بولر محمد عرفان کے متبادل کے طور پر محمد سمیع یا بلاول بھٹی کے ناموں پر غور کررہی ہے لیکن متبادل کھلاڑی کی طلبی اسی صورت میں ہوگی اگر پاکستانی ٹیم کوارٹر فائنل میں آسٹریلیا کو ہرا کر سیمی فائنل میں پہنچ جائے۔

محمد عرفان کولہے میں سٹریس فریکچر کے سبب عالمی کپ سے باہر ہو چکے ہیں۔

ان کی جگہ زیرِ غور آنے والے محمد سمیع 85 ون ڈے انٹرنیشنل میچوں میں 121 وکٹیں حاصل کر چکے ہیں تاہم انھوں نے اپنا آخری ون ڈے انٹرنیشنل میچ جون 2012 میں سری لنکا کے دورے میں کھیلا تھا۔

سمیع اس کے بعد سے ڈومیسٹک کرکٹ کھیلتے رہے ہیں اور اس سال فرسٹ کلاس کرکٹ میں انھوں نے پورٹ قاسم اتھارٹی کی طرف سے کھیلتے ہوئے آٹھ میچوں میں 28 وکٹیں حاصل کی ہیں۔

بلاول بھٹی نے پاکستان کی طرف سے دس ون ڈے کھیلے ہیں۔ وہ ورلڈ کپ سے قبل نیوزی لینڈ کے خلاف دو ون ڈے انٹرنیشنل کھیلے تھے لیکن دونوں میچ میں وہ خاصے مہنگےثابت ہوئے تھے خاص کر نیپئر کے ون ڈے میں انھوں نے 93 رنز دے ڈالے تھے۔

پاکستانی ٹیم کو اس عالمی کپ سے قبل اور اس کے بعد فٹنس اور بولنگ ایکشن کے مسائل کا سامنا رہا ہے۔

جنید خان اور محمد حفیظ ان فٹ ہوکر عالمی کپ کھیلنے سے محروم رہے جبکہ سعید اجمل مشکوک بولنگ ایکشن کے سبب عالمی کپ سے دستبردار ہوگئے تھے۔

اسی بارے میں