آخری ایشز ٹیسٹ میں انگلینڈ کو ایک اننگز اور 46 رنز سے شکست

تصویر کے کاپی رائٹ AFP
Image caption دوسری اننگز میں پیٹر سڈل نے چار کھلاڑیوں کو آؤٹ کیا

ایشز ٹیسٹ کرکٹ سیریز کے پانچویں اور آخری میچ میں آسٹریلیا نے میزبان انگلینڈ کو ایک اننگز اور 46 رنز سے شکست دے دی ہے تاہم انگلینڈ نے یہ سیریز تین دو کے سکور سے جیت لی ہے۔

واضح رہے کہ یہ مائیکل کلارک کی قیادت میں آسٹریلیا کی آخری فتح بھی ہے کیونکہ وہ اس ٹیسٹ میچ کے بعد دنیائے کرکٹ سے ریٹائرمنٹ لینے کا اعلان کر چکے ہیں۔

اوول میں کھیلے جانے والے میچ میں آسٹریلیا کے پہلی اننگز 481 رنز کے سکور کے جواب میں پہلے انگلینڈ کی ٹیم کو فالو آن کا سامنا کرنا پڑا تھا اور دوسری اننگز میں بھی وہ 286 رنز ہی بنا سکی۔

میچ کا تفصیلی سکور کارڈ

میچ کے چوتھے دن انگلینڈ کے آؤٹ ہونے والے آخری کھلاڑی معین علی تھے جو 35 رنز بنا کر پیٹر سڈل کی گیند پر کیچ آؤٹ ہوئے۔

اتوار کو آسٹریلوی بولر نے ایک مرتبہ پھر عمدہ بولنگ کرتے ہوئے انگلینڈ کے چار کھلاڑی آؤٹ کیے۔

تصویر کے کاپی رائٹ AFP

پیٹر سڈل نے دوسری اننگز میں اچھی بولنگ کرتے ہوئے چار انگلش بلے بازوں کو آؤٹ کیا۔ مچل مارش اور نیتھن لیون نے دو، دو جبکہ مچل جانسن اور سٹیو سمتھ نے ایک، ایک وکٹ حاصل کی۔

اس سے قبل چوتھے دن انگلینڈ کی جانب سے مارک وُڈ اور جوس بٹلر نے 203 رنز چھ کھلاڑی آؤٹ سے اننگز کا دوبارہ آغاز کیا اور ساتویں وکٹ کی شراکت میں مزید 22 رنز بنائے۔

اس شراکت کو مارک وُڈ کو چھ کے انفرادی سکور پر ایل بی ڈبلیو کر کے توڑا جبکہ بٹلر 42 رنز بنانے کے بعد مچل مارش کی دوسری وکٹ بنے۔

تصویر کے کاپی رائٹ Getty
Image caption مچل مارش نے دونوں اننگز میں عمدہ بولنگ کا مظاہرہ کیا ہے

بارش کے بعد جب میچ دوبارہ شروع ہوا تو پیٹر سڈل نے سٹوئرٹ براڈ کو بولڈ کر کے آسٹریلیا کو فتح سے ایک وکٹ کی دوری پر پہنچا دیا۔

آسٹریلیا کی جانب سے سڈل تین وکٹوں کے ساتھ سب سے کامیاب بولر رہے جبکہ نیتھن لیون اور مچل مارش نے دو، دو جبکہ سٹیو سمتھ اور مچل جانسن نے ایک، ایک وکٹ حاصل کی۔

اس سے قبل سنیچر کو میچ کے تیسرے دن کھیل کے اختتام پر انگلینڈ نے چھ وکٹوں کے نقصان پر 203 رنز بنائے تھے۔

انگلش ٹیم تیسرے دن پہلے سیشن میں اپنی پہلی اننگز میں 149 رنز بنا کر آؤٹ ہوگئی تھی اور اسے فالو آن پر مجبور ہونا پڑا تھا۔

اس سے قبل آسٹریلوی ٹیم اپنی پہلی اننگز میں 481 رنز بنا کر آؤٹ ہوگئی تھی۔

تصویر کے کاپی رائٹ AFP
Image caption سٹوارٹ براڈ اور معین علی اپنی ٹیم کو اننگز کی شکست سے بچانے کی کوشش کر رہے ہیں

پانچ ٹیسٹ میچوں پر مشتمل اس سیریز میں انگلینڈ کو تین ایک کی ناقابلِ شکست برتری حاصل ہے۔

ناٹنگھم میں کھیلے جانے والے ایشز ٹیسٹ سیریز کے چوتھے میچ میں انگلینڈ نے آسٹریلیا کو ایک اننگز اور 78 رنز سے شکست دے کر ایشز ٹرافی دوبارہ حاصل کی تھی۔

کارڈف میں ایشز ٹیسٹ سیریز کے پہلے میچ میں انگلینڈ نے آسٹریلیا کو 169 رنز سے شکست دی تھی تاہم لارڈز میں کھیلے گئے دوسرے ٹیسٹ میچ میں آسٹریلیا نے انگلینڈ کو 405 رنز سے شکست دے کر سیریز برابر کر دی تھی۔

اس کے بعد برمنگھم میں کھیلے جانے والے ایشز سیریز کے تیسرے کرکٹ ٹیسٹ میچ میں انگلینڈ نے آسٹریلیا کو آٹھ وکٹوں سے شکست دے کر برتری حاصل کر لی تھی۔

اسی بارے میں