ایشز کے فاتح کو ہرانا معمولی بات نہیں: مصباح

تصویر کے کاپی رائٹ Getty
Image caption ’پاکستانی ٹیم نے یہ سیریز تو جیت لی لیکن اب ان کنڈیشنز سے باہر جا کر کھیلنا اس کے لیے بہت بڑا چیلنج ہوگا‘

پاکستانی کرکٹ ٹیم کے کپتان مصباح الحق کا کہنا ہے کہ ایشیز کی فاتح ٹیم کے خلاف ٹیسٹ سیریز جیتنا پاکستانی ٹیم کا بہت بڑا کارنامہ ہے۔

مصباح الحق نے شارجہ ٹیسٹ میں 127 کی فتح کے بعد کہا کہ جیت جیت ہوتی ہے آپ کسی بھی ٹیم کے خلاف حاصل کریں لیکن ایک ایسی ٹیم جس نے ایشیز جیتی ہے اور جو دنیا کی صف اول کی ٹیموں میں سے ایک ہے اس کے خلاف سیریز کا جیتنا معمولی بات نہیں ہے۔

سپنرز نے پاکستان کو عالمی نمبر دو بنوا دیا

شارجہ ٹیسٹ کا فیصلہ کن دن

مصباح الحق نے کہا کہ انھوں نے سیریز سے قبل ہی کہا تھا کہ تین صفر کی بات نہ کی جائے بلکہ یہ دیکھا جائے کہ اگر آپ انگلینڈ کے خلاف کسی بھی مارجن سے جیتیں گے تو اس کی بھی اہمیت ہوگی۔

’دو صفر کی یہ جیت تین صفر کے کلین سوئیپ سے کسی طرح کم نہیں۔‘

مصباح الحق نے کہا کہ پہلے ٹیسٹ میں پاکستانی ٹیم کی بدقسمتی رہی کہ اس کے میچ ونر یاسر شاہ ان فٹ ہونے کے سبب وہ میچ نہ کھیل سکے اور ان کے نہ ہونے سے بہت زیادہ فرق پڑا۔

تصویر کے کاپی رائٹ Getty
Image caption یاسر شاہ نے سیریز میں سب سے زیادہ وکٹیں حاصل کیں

پاکستانی کپتان نے انگلینڈ کی ٹیم کی تعریف کرتے ہوئے کہا کہ اس نے بہت ہی اچھی کرکٹ کھیلی۔ ’انگلش ٹیم بہت منظم رہی اور اس نے پاکستانی ٹیم کو نہ آسانی سے وکٹیں دیں اور نہ آسانی سے رنز بنانے دیے۔‘

مصباح الحق نے کہا کہ شارجہ ٹیسٹ کے آخری دن وہ اپنے بولرز کی عمدہ کارکردگی اور وکٹ کو دیکھ کر جیت کے لیے بہت زیادہ پرامید تھے۔

مصباح الحق کا کہنا ہے کہ کسی بھی سیریز سے قبل ہر ٹیم کی سوچ مثبت ہوتی ہےاور متحدہ عرب امارات میں چونکہ پاکستانی ٹیم بہت عرصے سے کھیل رہی ہے لہٰذا وہ یہاں کی کنڈیشنز سے اچھی طرح واقف ہے اور اسی وجہ سے وہ یہاں اچھی کرکٹ کھیل رہی ہے۔

انھوں نے کہا کہ پاکستانی ٹیم نے یہ سیریز تو جیت لی لیکن اب ان کنڈیشنز سے باہر جا کر کھیلنا اس کے لیے بہت بڑا چیلینج ہوگا۔

اسی بارے میں