پاکستانی خواتین کی نو وکٹوں سے کامیابی

تصویر کے کاپی رائٹ AP
Image caption پاکستان کرکٹ ٹیم نے جارحانہ انداز میں بیٹنگ شروع کی

آئی سی سی ورلڈ ٹی 20 کے خواتین کے مقابلوں میں پاکستان کی ٹیم نے انتہائی عمدہ بیٹنگ کا مظاہرہ کرتے ہوئے بنگلہ دیش کی ٹیم کو نو وکٹوں سے شکست دے دی ہے۔

پاکستانی ٹیم کی اس ٹورنامنٹ میں دوسری کامیابی کا سہرا سدرہ امین اور بسمہ معروف کی شاندار اور جارحانہ بلے بازی کو جاتا ہے۔

بنگلہ دیش نے پہلے کھیلتے ہوئے پاکستان کو میچ جیتنے کے لیے 114 رنز کا ہدف دیا تھا جو پاکستانی کھلاڑیوں نے سدرہ کی نصف سنچری کی بدولت 16.3 اووروں میں آسانی سے حاصل کر لیا۔

سدرہ امین نے اپنی اننگز میں چار شاندار چوکے لگائے اور مجموعی طور پر 48 گیندوں کا سامنا کر کے 53 رنز بنائے۔ یہ سدرہ کی ٹی 20 میچوں میں پہلی نصف سنچری تھی۔ بسمہ معروف نے بھی اپنی اننگز میں چار چوکوں کی مدد سے 42 گیندوں میں 43 رنز سکور کیے۔

بولنگ کے شعبے میں سب سے کامیاب بولر انم امین رہیں، جنھوں نے 12 رنز دے کر دو کھلاڑیوں کو آؤٹ کیا۔ انم امین ان مقابلوں میں اب تک سب سے زیادہ وکٹیں حاصل کرنے والی بولر رہیں۔ کپتان ثنا میر نے اپنے چار اووروں میں 16 رنز دے ایک کھلاڑی کو آؤٹ کیا۔

بنگلہ دیش کی اننگز کے دوران پاکستان بولروں اور فیلڈروں نے نو کھلاڑیوں کو آؤٹ کر دیا تھا۔

تصویر کے کاپی رائٹ AFP
Image caption بنگلہ دیش کے خلاف پاکستان کا میچ بڑا اہم تھا

بنگلہ دیش کی طرف سے سب سے کامیاب بلے باز فرحانہ حق رہیں جنھوں نے 37 گیندوں پر 36 رنز بنائے۔

پاور پلے میں بنگلہ دیش کی ٹیم نے 26 رنز بنائے تھے اور اس کی دو کھلاڑی آؤٹ ہوئیں۔

یہ میچ دہلی میں فیروز شاہ کوٹلہ کے میدان میں کھیلا گیا۔

پاکستان کی خواتین کی ٹیم اس میچ سے قبل انڈیا کی ٹیم کو شکست دے چکی ہے۔

پاکستان کے گروپ میں انگلینڈ اور ویسٹ انڈیز کی ٹیموں کے چار چار پوائنٹس ہیں۔ جبکہ پاکستان اور انڈیا کے دو دو پوائنٹس ہیں۔

پاکستانی ٹیم کی کپتانی ثنا میر کر رہی تھیں جبکہ جہاں آرا عالم بنگلہ دیشی ٹیم کی کپتان تھیں۔

تصویر کے کاپی رائٹ Sana Mir

میچ سے قبل جہاں آرا عالم نے کہا تھا کہ اس پچ پر 120 یا 125 کا ہدف میچ جیتنے کے لیے کافی ہو گا، جب کہ ثنا میر نے کہا تھا کہ وہ بنگلہ دیش کی ٹیم کو 100 رنز کے اندر اندر آؤٹ کرنے کی کوشش کریں گی۔

پاکستان کی ٹیم میں ایک تبدیلی کی گئی اور عالیہ ریاض کی جگہ سعدیہ یوسف کو ٹیم میں شامل کیا گیا۔

قبل ازیں آسٹریلیا کی ٹیم نے سری لنکا کی ٹیم کے خلاف میچ نو وکٹوں سے جیت لیا تھا۔

اسی بارے میں