باکسر مینی پیکیو نے اپنا ’آخری‘ مقابلہ جیت لیا

تصویر کے کاپی رائٹ Getty
Image caption مینی پیکیو کا کہنا تھا کہ یہ ان کا آخری میچ ہوگا

فلپائن کے باکسر مینی پیکیو نے اپنے 21 سالہ کریئر کے ’آخری مقابلے‘ میں امریکی باکسر لاموتھی بریڈلی کو شکست دے دی ہے۔

سنیچر کو لاس ویگاس میں ہوئے اس مقابلے سے قبل مینی پیکیو نے کہا تھا کہ یہ ان کا آخری میچ ہوگا۔

فلپائن سے تعلق رکھنے والے 37 سالہ مینی پیکیو وزن کے مختلف درجوں کے مقابلوں میں کئی عالمی ٹائٹل اپنے نام کر چکے ہیں اور انھیں دنیا کا بہترین باکسر بھی تسلیم کیا گیا ہے۔

میچ کے بعد مینی پیکیو کا کہنا تھا کہ ’میں نے اپنی فیملی کے ساتھ وعدہ کیا ہے کہ میں اس میچ کے بعد ریٹائر ہو جاؤں گا۔‘

خبر رساں ادارے اے ایف پی کے مطابق مینی پیکیو سنہ 2010 سے فلپائن کی پارلیمان کے رکن ہیں اور ان کا کہنا ہے کہ وہ اپنے سیاسی کیریئر پر توجہ دینا چاہتے ہیں۔

مینی پیکیو آئندہ ماہ ہونے والے سینیٹ کے انتخابات کا بھی انتظار کر رہے ہیں۔

امریکی باکسر 32 سالہ ٹموتھی بریڈلی اور مینی پیکیو کے درمیان ویلٹر ویٹ کا تیسرا مقابلہ تھا اور اس کے ساتویں اور نویں راؤنڈ میں مینی پیکیو نے ٹموتھی بریڈلی کو دو بار گرا دیا تھا۔

اسی بارے میں