’کرکٹ میں پوائنٹ سکورنگ سسٹم حماقت ہے‘

تصویر کے کاپی رائٹ Getty

انگلینڈ کے سابق ٹیسٹ کرکٹ کپتان مائیکل وان نے پاکستان اور سری لنکا کے درمیان موسمِ گرما میں ٹیسٹ سیریز کے لیے پوائنٹ سکورنگ کا نظام متعارف کروانے کے منصوبے کو’حماقت‘ قرار دیا ہے۔

ادھر سری لنکا کی ٹیسٹ ٹیم کے کپتان اینجلو میتھیوز نے بھی اس نظام کو متعارف کروانے کے منصوبے پر سوال اٹھایا ہے۔

مائیکل وان کے مطابق امید کی جا رہی ہے کہ کرکٹ میں ایسا نظام متعارف کروایا جائے گا جس کے مطابق ٹیسٹ، ایک روزہ اور ٹی 20 میچوں میں ایوارڈ پوائنٹس دے جائیں گے۔

سابق انگلش کپتان کا کہنا ہے اس نظام سے کرکٹ میں پیچیدگیاں پیدا ہوں گی اور اس کی ضرورت نہیں ہے۔

واضح رہے کہ انگلینڈ اور سری لنکا کی ٹیموں کے درمیان تین ٹیسٹ، پانچ ایک روزہ اور ایک ٹی 20 میچ کھیلا جائے گا۔

انگلینڈ اینڈ ویلز کرکٹ بورڈ اس حوالے سے پاکستان اور سری لنکا کے بورڈز کے ساتھ مذاکرات کر رہا ہے اور کسی فیصلے پر پہنچنے سے پہلے دونوں بورڈوں کی رضا مندی ضروری ہے۔

تاہم انگلینڈ کے سابق کپتان کا کہنا ہے: ’میرے خیال سے یہ ایک احمقانہ خیال ہے۔ کبھی کبھی بہت سے دماغ معاملات کو مشکل بنا دیتے ہیں۔

ان کا مزید کہنا تھا کہ سیریز کے اختتام پر ایک چبوترے پر آپ 45 کھلاڑیوں کا کیا کریں گے؟

آسٹریلیا کے سابق بولر جیسن گلیسپی نے کرکٹ میں پوائنٹ سکورنگ کا نظام متعارف کروانے کی حمایت کی ہے۔

تصویر کے کاپی رائٹ Reuters

دوسری جانب سری لنکا کے ٹیسٹ کرکٹ کپتان اینجلو میتھیوز نے بھی انگلینڈ اور سری لنکا کے خلاف شروع ہونے والی سیریز کے دوران پوائنٹ سکورنگ کا نظام متعارف کروانے کے منصوبے پر سوال اٹھایا ہے۔

خبر رساں ادارے اے ایف پی کے مطابق اینجلو میتھیوز نے جمعے کو لارڈز میں میڈیا سے بات کرتے ہوئے کہا: ’میں روایتی کرکٹ سے دور ہونے کو پسند نہیں کرتا تاہم منتظمین اس حوالے سے جو بھی فیصلہ کریں گے ہمیں اس کی پابندی کرنی ہو گی اور آگے بڑھنا ہو گا۔‘

28 سالہ آل راؤنڈر کا کہنا تھا کہ ہمیں اس کا تجربہ کرنا ہو گا اور پھر دیکھنا ہو گا کہ آیا یہ اچھا ہے یا برا۔

اینجلو میتھیوز کے مطابق ’میں کرکٹ کی روایات سے دور ہونے کو پسند نہیں کرتا اور مجھے ٹیسٹ کرکٹ کے پرانے پانچ دن ہی پسند ہیں۔‘

سری لنکا اور انگلینڈ کے درمیان تین ٹیسٹ میچوں پر مشتمل سیریز 17 مئی سے شروع ہو گی۔

سری لنکا کو اس سیریز کے دوران کمار سنگا کارا اور جے وردھنے کی خدمات حاصل نہیں ہوں گی۔ سری لنکا کے یہ دونوں معروف بیٹسمین کرکٹ سے ریٹائر ہو چکے ہیں۔