میسی کے مجسمے کی نقاب کشائی کر دی گئی

تصویر کے کاپی رائٹ Reuters

ارجنٹائن کے فٹبال سٹار لیونل میسی کے قومی ٹیم سے ریٹائرمنٹ کے اعلان کے چند دن کے بعد ہی بیونس آئرس میں ان کے مجسمے کی نقاب کشائی کر دی گئی ہے۔

بیونس آئرس کے میئر ہوریسیو رودریگیس نے دریائے پلیٹ کے کنارے پر اس مجسمے کی نقاب کشائی کی۔

میسی نے کوپا امیریکا فٹبال ٹورنامنٹ کے فائنل میں اپنی ٹیم کی چلی کے ہاتھوں شکست کے بعدبین الاقوامی فٹبال کو خیرباد کہنے کا اعلان کیا تھا۔

اس کے بعد سے ان کی حمایت میں پیغامات کی بارش شروع ہو گئی ہے۔

٭ میسی سے میراڈونا اور صدر کی استدعا

ارجنٹائن کے شہریوں نے سوشل میڈیا کا سہارا لیتے ہوئے 29 سالہ کھلاڑی سے درخواست کی ہے کہ وہ اپنے فیصلے پر نظرِ ثانی کریں۔ وہ ’لیو، مت جاؤ‘ کا ہیش ٹیگ استعمال کر رہے ہیں۔

ان لوگوں میں ارجنٹائن کے صدر ماؤریسیو میکری بھی شامل ہیں۔ انھوں نے ٹویٹ کی: ’مجھے اپنی ٹیم پر اس سے زیادہ فخر کبھی نہیں ہوا۔ مجھے امید ہے کہ میں کئی برسوں تک دنیا کے بہترین کھلاڑی کو دیکھنے کا لطف اٹھاتا رہوں گا۔ ’مت جاؤ، لیو۔‘

یہ ہیش ٹیگ بیونس آئرس کی سڑکوں اور ٹریفک کے نشانات پر بھی نظر آ رہا ہے۔

تصویر کے کاپی رائٹ Getty

ان کے مداح منگل کے روز مجسمے کے قریب جمع ہوئے۔

بہت سوں نے میسی کی سی قمیص پہن رکھی تھی جب کہ دوسروں نے مجسمے کے سامنے ان کی ہنر کی نقل کی۔

کانسی کا یہ مجسمہ پاسیو دی لا گلوریا نامی سڑک پر نصب کیا گیا ہے جہاں ارجنٹائن کے کئی دوسرے مشہور کھلاڑیوں کے مجسمے بھی موجود ہیں۔ ان میں ٹینس کی کھلاڑی گیبریئلا سباٹینی بھی شامل ہیں۔

میسی نے کوپا امیریکا کے فائنل میں شکست کے بعد کہا تھا: ’میرے لیے قومی ٹیم اب ختم ہو گئی ہے۔ میں جو کر سکتا تھا وہ میں نے کر لیا ہے۔ چیمپیئن نہ بن پانا تکلیف دہ ہے۔‘

اس سے قبل میسی اس قومی ٹیم کا بھی حصہ تھے جسے 2014 کی عالمی کپ میں جرمنی نے ایک صفر سے ہرایا تھا۔

تاہم وہ کلب کی سطح پر خاصے کامیاب رہے ہیں اور بارسلونا کی جانب سے آٹھ لا لیگا، جب کہ چار چیمپیئنز لیگز جیت چکے ہیں۔

اسی بارے میں