عماد وسیم کا بولرز کی عالمی درجہ بندی میں چوتھا نمبر

تصویر کے کاپی رائٹ Getty
Image caption عماد وسیم نے ویسٹ انڈیز کے خلاف تین ٹی 20 میچوں میں مجموعی طور پر نو وکٹیں حاصل کیں

متحدہ عرب امارات میں پاکستان اور ویسٹ انڈیز کے درمیان کھیلی گئی تین ٹی 20 انٹرنیشنل میچوں کی سیریز میں عمدہ کاکردگی کےنتیجے میں عماد وسیم بولرز کی آئی سی سی ٹی20 رینکنگ میں چوتھے نمبر پر آگئے ہیں۔

نوجوان آل راؤنڈر عماد وسیم ویسٹ انڈیز کے خلاف شاندار کارکردگی کا مظاہرہ کرتے ہوئے ٹی 20 درجہ بندی میں 33 درجے ترقی پاتے ہوئے سرفہرست پانچ باؤلرز میں شامل ہوئے ہیں۔

خیال رہے کہ پاکستان نے حال ہی میں کھیلی جانے والی تین ٹی 20 انٹرنیشنل میچوں کی سیریز میں ویسٹ انڈیز کو تمام میچوں میں شکست دی تھی۔

٭ پاکستان کا کلین سویپ، عماد وسیم چھاگئے

٭ ویل ڈن پاکستان مگر کب تک؟

عماد وسیم نے تمام میچوں میں پاکستان ٹیم کو بہتر آغاز فراہم کیا اور مجموعی طور پر نو وکٹیں لینے میں کامیاب رہے۔

ان کی اس کاکردگی پر انھیں سیریز کا بہترین کھلاڑی بھی قرار دیا گیا۔

عماد وسیم کے علاوہ آئی سی سی ٹی ٹوئنٹی رینکنگ میں بہتری پانے والے دیگر پاکستانی کھلاڑیوں میں سہیل تنویر، بابر اعظم اور خالد لطیف بھی شامل ہیں۔

تصویر کے کاپی رائٹ Getty
Image caption عماد وسیم ٹی 20 درجہ بندی میں 33 درجے ترقی پاتے ہوئے سرفہرست پانچ باؤلرز میں شامل ہوئے ہیں

بابراعظم ویسٹ انڈیز کے خلاف سیریز میں 101 رنز بنا کر کامیاب بلے باز رہے جنھیں 201 سے 66 ویں نمبر پر جگہ ملی ہے۔ سیریز میں 95 رنز بنانے والے خالد لطیف بھی 26 درجے ترقی کرتےہوئے سرفہرست 100 بلے بازوں میں شامل ہوئے اور ان کا موجودہ نمبر 94 ہے، جبکہ سہیل تنویر 36ویں پوزیشن پر ہیں۔

ٹی 20 ٹیموں کی درجہ بندی میں پاکستان سیریز میں عالمی چمپیئن کو شکست دینے کے باوجود 111 پوائنٹس کے ساتھ ساتویں نمبر پر ہی موجود ہے تاہم ویسٹ انڈین ٹیم ایک درجے تنزلی کے ساتھ چوتھی پوزیشن پر چلی گئی ہے۔

پاکستان اور ویسٹ انڈیز کے درمیان تین ایک روزہ میچوں کی سیریز کا پہلا میچ جمعے کے روز شارجہ میں کھیلا جائے گا۔

متعلقہ عنوانات

اسی بارے میں