نیوزی لینڈ کی ’بلیِ اوّل‘

تصویر کے کاپی رائٹ Twitter
Image caption نیوزی لینڈ کی وزیر اعظم جیسن آرڈرن اپنی بلی پیڈلز کے ساتھ

بلیوں کے چاہنے والوں کو یہ جان کر بہت خوشی ہوگی کہ نیوزی لینڈ کی نئی وزیر اعظم بھی ان میں سے ایک ہیں۔

ملیے نیوزی لینڈ کی خاتون اوّل کی بلیِ اوّل 'پیڈلز' سے جو کہ ملک کی نئی اور کم عمر ترین وزیر اعظم جیسنڈا آرڈرن کی پالتو بلی ہیں۔

مِس آرڈرن بائیں بازو کی جماعت لیبر پارٹی کی رہنما ہیں اور 2008 میں 28 برس کی عمر میں انھوں نے پارلیمان میں سیٹ حاصل کی تھی۔

پیڈلز ان کی پالتو بلی ہیں اور ان کی خاص بات ان کے پیروں کے الٹے انگوٹھے ہیں۔ 21 اکتوبر کو پیڈلز کا ٹوئٹر اکاؤنٹ شروع کیا گیا اور اس کا نام ' @فرسٹ کیٹ آف این زی'، یعنی 'نیوزی لینڈ کی بلی اوّل' رکھا گیا۔

گو کہ یہ ابھی تک واضح نہیں ہے کہ اس اکاؤنٹ کو کون چلا رہا ہے لیکن اس بات میں کوئی شک نہیں کہ اس بلی کو سوشل میڈیا پر خاصی پذیرائی مل رہی ہے۔

تصویر کے کاپی رائٹ AFP
Image caption جیسنڈا آرڈرن نیوزی لینڈ کی کم عمر ترین وزیر اعظم منتخب ہوئی ہیں

ٹوئٹر پر ایک صارف نے جیسن آرڈرن کے جیون ساتھی کے حوالے سے لکھا: 'پیڈلز بلیِ اوّل ہیں اور کلارک گے فورڈ مرد اوّل۔ یہ بہت ہی زبردست بات ہے۔'

پیڈلز کی پہلی ٹویٹ کے جواب میں ایک اور صارف نے لکھا 'مجھے یہ تصویر بہت اچھی لگی۔ شاید اسی لیے شاید تمہاری امی جیت گئیں۔'

پیڈلز کے ٹوئٹر اکاؤنٹ کے بعد کئی صارفین نے اپنے پالتو جانوروں کے بارے میں ٹویٹ کی لیکن ساتھ ساتھ دیگر ممالک کے سیاسی رہنماؤں کے پالتوں جانورں کے ٹوئٹر اکاؤنٹ سے بھی پیڈلز کے لیے پیغامات جاری کیے گئے۔

برطانوی وزیر اعظم کی رہائش گاہ 10 ڈاؤننگ سٹریٹ میں رہنے والے بلے لیری کے غیر سرکاری اکاؤنٹ نے بھی پیڈلز کو ٹوئٹر پر خوش آمدید کہا اور ویسٹ منسٹر کی بلی ایوی کے اکاؤنٹ سے بھی پیڈلز کے لیے پیغام جاری کیا گیا جس میں لکھا گیا : 'ٹوئٹ پر خوش آمدید پیڈلز، مزے کرو۔'

نیوزی لینڈ کی وزیر اعظم نے مقامی میڈیا سے بات چیت کرتے ہوئے کہا کہ انھیں اس بات کا علم نہیں ہے کہ یہ اکاؤنٹ کون چلا رہا ہے لیکن وہ انھیں پڑھ کر کافی محظوظ ہو رہی ہیں۔

انھوں نے مذاقاً کہا: 'یاد رہے کہ پیڈلز کے انگوٹھے ہیں، تو بہت ممکن ہے کہ شاید وہ خود یہ اکاؤنٹ چلا رہی ہو۔'

پیڈلز کے علاوہ ملائیشیا کے وزیر اعظم نجیب رزاق بھی بلیوں کے جانے پہچانے شوقین ہیں اور ان کی سرکاری رہائش گاہ میں چار بلیاں ہیں۔

ان کے علاوہ تائیوان اور جنوبی کوریا کے سربراہان کے ہاں بھی پالتو جانور ہیں۔

اسی بارے میں